13 July 2024: Vawiin khan Chief Minister Pu Lalduhoma leh Pu Rakesh Swami, Group President, Godrej te chu Mumbai-ah an inkawm a, CM hian Mizorama Godrej Agrovet te hmalak theihna a sawipui.
Tuna Bukvanneia an Oilpalm mill upgrade chungchang te, Godrej Samadhan center Mizorama kalpui ve thu te, Oil palm plantation neituten thlai dang; Sawhthing, Aieng, Hmarcha leh a remchang dang nena chin pawlha (intercropping) hlawk zawka hna an thawh theih dan turte an sawidun.
Pu Rakesh Swami hian Mizoramah Sapthei processing te, Fish feed te, fertilizer te, Poultry farm leh frozen food te, Sahbon leh Glycerin thlenga a siamna an bun theih a beisei thu Chief Minister hnenah hian a thlen a. An hmalak theihna te en turin a Group hnuaia business hrang hrang hruaitute nen August thlaah Mizoram rawn zin an tum a ni.
Chief Minister hian Mumbai a cham chhung hian Industrialist leh Politician pawimawh te a remchan dan anga hmuh zel a tum a ni. Pu Jonathan Lalremruata, OSD to CM chuan Chief Minister hi a tawiawm a ni.
