New Delhi-a 9th NITI Aayog Governing Council neihah CM Pu Lalduhoma’n thil pawimawh hrang hrang a thlen
July 28, 2024: Chief Minister Pu Lalduhoma’n nimin khan 9th NITI Aayog Governing Council New Delhi-a neihah Mizoram mamawh hmasa chu inkalpawhna kawng tha zawk leh tam zawk neih a ni tih a sawi.
Prime Minister Narendra Modi kaihhruainaa neih 9th NITI Aayog Governing Council-ah thu sawiin Chief Minister chuan Viksit Bharat 2047 Mizorama a hlawhtlin theihna tur thil pawimawh hrang hrang a thlen a, 16th Finance Commission hnena Mizoram mamawh an thehluhte chu Viksit Bharat 2047 a hlawhtlin theih nana thil pawimawh tak tak te an nih thu a sawi.
Pu Lalduhoma chuan Mizoramin state dangte aia hmasawnna a kalpui tlai bik thu sawiin, midang hnunha kal reng erawh an tum loh thu a sawi a, inkalpawhna kawng tha zawk Mizoramin a mamawh thu sawi bawkin, Mizoram road density chu national average aiin a la hniam bik a ni, a ti.
Zirna, hriselna, tui, power, faina leh administrative infrastructure-ah indaih lohna a la nasa tih sawiin, khawpui fel fai leh leilung chhiatna laka him, state hmasawnna bulthut (growth centre) ni thei neih kan mawmawh a ni, a ti bawk. Bana kaih Policy an kalpui turah sorkar laipuiin special package-in pui se an duh thu a sawi bawk.
Chief Minsiter chuan Viksit Bharat tihlawhtling turin remna leh muanna neih a tul hmasaa, Mizoram chu International border pahnih karcheh; a thenawm rama harsatna thlengte vanga chim buai reng a ni a, Security Related Expenditure kan dawn a rem ta chiah lo a nih pawhin sorkar laipui hian Peace dividend tal min ngaihtuahsak se kan duh a ni, a ti bawk.
