30 July 2024: Nimin khan Revenue Minister B. Lalchhanzova chuan a Pisa-ah chanchinbu mite a kawm a, Land Revenue & Settlement Deptt chuan mipui leh sorkar indawrna a harsatna awm leh thil kal muang lutuk tih zia awma, sorkar kaphung fel zawk siam turin kawng hrang hrangah hma a la mek niin a sawi.
Ram pass siam chhung rei lutuk tihtawi dan kawng dap mek a ni a ti a, LR&S department-ah hian surveyor post 137 awmin heng zinga Post 76 te chu hnawh khah loh anni a, MPSC in July ni 9 khan surveyor 15 lakna tur a tichhuak tawh a, hei hian engemaw chen min chhawk kan beisei a ni, a ti. Surveyor indaihlohna avanga mipui tawrhna phuhru turin private survey firm te empanel turin hmalak mek a a ni, a ti bawk.
Revenue Minister chuan, AMC area a online Land tax payment kalpui mek chu a hlawhtlinna hmuh mek a ni a, 2025 kum ral hmain Mizoram puma online tax payment hi kalpui tum a ni, a ti.
Aizawl leh Lunglei te hi District ah pawh a lian leh district headquarters pawh Municipal Body din ngai khawpa khawpui lian anlo nih takah chuan LR&S department office mamawhna pawh mipui mamawh phuhruk harsa khawpin a lo tam ta a, chuvangin Aizawl North leh Aizawl South bakah Lungleiah te hian Senior SO post siam a an hnuaiah SO pakhat, ASO pakhat leh ASO (T) Pahnih theuh dah belh a heng district lian pahnih hi thuamchak tum an ni, a ti. Customer care-ah tan lak an tum thu sawiin, hemi kawngah thawktute pawn tan la zual sauh sauh a, Mipui dawrtute dawh thei taka dawr thin turin an inchah thu a sawi bawk.
