30 July 2024: Vawiin khan Mizo Students’ Union (MSU), Regional Headquarters, Lunglei te’n Saikuti Hall-a MZU hnuaia under graduate examination 2024-a rank holder-te lawmpuina hun an buatsaih chu Lunglei High Powered Committee Vice Chairman leh Lunglei North Bialtu MLA ni bawk, Pu V.Malsawmtluanga chuan Khuallian niin a hmanpui a. Lunglei Municipal Council (LMC) Vice Chairman Pu K.Lalrinawma chu khual zahawm niin, MSU General Headquarters-a General Secretary Pu Lalramhluna Fanai chu uaptu a ni.
Khuallian Pu V.Malsawmtluanga chuan zirlai hlawhtlinna changte leh an chhungte a lawmpui thu sawiin, an hma lam hun atan duhsakna a hlan a. Zirlai kalkhawmte chu “Vawi hnih peih lo an fail fan,” tih hre reng a, teirei peih tur leh ruihhlo laka inthiar fihlim turin a chah a. Pathian thu, “Thawhrimna zawng zawngah hlawkna a awm,” tih a taka chang thei tura thawkrim turin zirlaite chu fuihin; thawkrim tur chuan zing thawh tlai a rem lo va, mut tlema thawh tam a ngai a ni, a ti.
Zirlai ti ṭhate lawmpuina hun buatsaihah hian MSU Regional Headquarters Lunglei huam chhunga zirlai ti ṭha, kum 2024 under graduate examination-a rank holder chin mi 20 hnenah chawimawina thuziak leh puanbah hlan an ni.
