01 Aug 2024: Bairabi leh Sairang inkar, rel kawng siam zawh tawh chin km 16-a thui chu nimin khan endik niin, Hortoki Station thlengin Rel Pindan 12 nei thlantir a ni.
Rel kawng himna endiktu Civil Aviation Ministry hnuaia Commissioner of Railway Safety chuan rel kawng thar hi an endik a, railway hotute hnen atanga thudawn danin endiktute hian him tawka an hriat chuan Bairabi atangin Hortoki Station inkarah Bungrua leh Khualzin phur chi Rel a tlan thei tawh dawn a ni.
Hortoki Station-ah hian engkim peih fel a ni tawh a, Rel tlan lai kaihhruaina khawl zawng zawng pawh hman chhin vek a ni a, tluang takin endikna kalpui a ni. Bairabi leh Hortoki inkarah hian Lei dawh leh Leiverh zawng zawng te chu endiktute hian mipui tan a him tawk em tih uluk takin an enfiah vek bawk a ni.
Commissioner of Railway Safety hi Guwahati atangin Officer thahnem takin an rawn tawiawm a, Mizoram sorkar atangin Pu Hrangtawna Railway Consultant a tel bawk. (DD)
