Assam Rifles lamin an MoU tur an peih har avanga hmalakna khawtlai ta ni-a sawi a ni
02 Aug 2024: Nimin August ni 1 khan Chief Minister Pu Laduhoma chuan New Delhi-ah Union Home Minister Pu Amit Shah, DoNER Minister Pu Jyotiraditya Scindia leh mi pawimawh dangte a kawm.
Chief Minister chuan, tunhnaia Central sawrkarin raltlan (displaced persons) te tana Mizoram sawrkar Rs. Vbch 10 a rawn pek avangin lawmthu a sawi a. Manipur harsatna tawh thuah Home Ministry leh Manipur tlangmi mipuite aiawh ITLF hruaitute chuan inbiakna nei thei se thaa a hriat thu a hrilh bawk.
Pu Amit Shah chuan, Cyclone Remal tuartute endika rawn kal special team te report hi Finance lamah a la awm rih a, a rang lamin kan lo ngaihven anga, chhawmdawlna sum pawh engemawzat kan rawn pe ang che u, tiin Chief Minister hi a lo hrilh bawk.
Assam Rifles sawn chhuah chungchang pawh an sawidun a, Assam Rifles lamin an MoU tur an peih har avanga hmalakna a khawtlai tak thu sawi lan a ni. Home Minister hian, Ministry atangin officer lian pahnih ka rawn tir anga, anni hovin Aizawlah AR lam te nen lo sawidun leh ula, tiin hmalak zel dan tur a ruahmanna a lo hrilh a. A tahtawla an chhuah phei a tul tur thu pawh a sawi a ni. Chief Minister chuan, Assam Rifles leh Mizoram sawrkar ngaihdan inhmu rem lo lai te a awm anih chuan inpawh taka sawiho an inpeih thu a hrilh ve bawk.
DoNER Minister Pu Jyotiraditya Scindia nena an inkawmnaah Serchhip district hospital sak dan tur te, Mizoram a oil palm chingtute chungchang leh Ministry of DoNER hnuaia Mizoramin pending projects a neih chungchang te an sawi a ni.
Oil Palm chingtuten hlawk zawka an thar theih nan Mizoramah Samadhan Centre dah ve ni se an ti a. Awmze nei zawka a kal theih nan Mizoramah Refinery din law law ni se thaa an hriat thu pawh an sawi a ni. Tunah hian DoNER Ministry-ah Mizoramin a thehluh project inchiah (pending) mek 93 a awm thu leh heng atana sum ruahman zat chu Rs. Vbch 1716 vel anih thu DoNER Minister hian Chief Minister hi a lo hrilh a. “Project inchiah rei tawh tam tak, vawiina han kalpui atana fuh tawh lo te hi project tharin rawn thlak ula, ka lo pawmsak ang che u” tiin a lo hrilh a ni. (DIPR)
