10 Aug 2024: Vawiin khan Chief Minister Pu Lalduhoma chuan a chenna inah ramri chungchang sawia lo zin Pu Atul Bora, Minister, Border Protection & Development, Assam leh a team te a kawm.
Chief Minister chuan, ramria kan harsatna hi kan hunlai ngeia chin fel tuma hmalak kan duh a. Inbiakna hi vawi tam tak a lo awm tawh thin a, thutlukna hi status quo tih a ni deuh zel a. Hei hi inremna tak tak thlentu nilovin a tihkhawtlaina mai a nihna chen a awm. Official level-ah inbiakna a kal zel ang a, a pawimawh zawk chu ram hruaituluten inrem duhna tak takna rilru pua hma kan lak tlan hi a ni, tiin Pu Atul Bora hi a lo hrilh a. Inremna neih fel hma chu a khawi lam ve ve mahin ramriah buaina thlen thei harsatna siam loh tha an tih thu te inpawh takin an sawi dun. Pu Atul Bora pawh hian inremna tluantling nei tura inbiakna neih zel chu tha a tih thu sawiin; inkawmna hun tha a siamsak avangin Chief Minister hi lawmthu a hrilh a ni.
Chief Minister hi Pu Lalmuanpuia Punte, Adviser to CM chuan a tawiawm a. Pu Lalmuanpuia Punte leh Pu Atul Bora te hi zirlai pawla lo inhmang dun thin, thian tha tak an ni nghe nghe. Minister Pu Atul Bora hi Assam Border Protection & Development official pawimawh Pu Gyanendra Dev Tripathi, IAS, Principal Secretary, Pi Prabiti Thaosen, Secretary, Smti Subhalaxmi Deka, Director leh midangten an tawiawm a ni. (DIPR)
