August 14, 2024 : MNF Media & Publicity Board chuan ZPM sawrkar-in Indian Air Force kuta Lengpui Airport hlan mai a duh dawn nia lang chu MNF chuan a duh lo takzet tih an sawi.
Vawiina Aizawl Press Club a thuthar thehdarhtute an kawmnaah MNF General Secretary Pu J Malsawmzuala Vanchhawng chuan sorkar lo awm tawhten harsatna tam tak paltlanga an din leh harsa taka an tih changtlun chhoh, Mizoram tana ro tling (Asset) pawimawh tak ZPM sorkarin thehthang a tum dan chu mipuite pawisawina nasa tak a nih dawn avangin MNF chuan a pawmpui thei lo a, a tawp thlenga dodal a tum tih a sawi.
Indian Air Force leh Mizoram mipuite’n Lengpui airport hman an tum dan chu a inpersan tih sawiin, IAF chuan venhimna lam an ngaihpawimawh laiin Mizoram mipuite tan chuan thlawhtheihna hmanga veivahna awmchhun a ni tih a sawi a, IAF kuta hlan a nih rualin Mizoram mipuite’n harsatna an tawk nghal dawn tih a sawi bawk.
MNF General Secretary chuan “Lengpui Airport” hi Mizoram pumpuiah “Single-Asset” kan neih zing a hlu ber a ni tih hi i theihnghilh lovang u, tia sawiin, Pu J Malsawmzual Vanchhawng chuan kum 25 chuang Zoram mipuiin namen lo va an lo tangkaipui tawh chu ZPM hruaitute’n a enkawl zuina tur sum takngial pawh an dil chhuak thei lo a nih chuan thil lungchhiatthlak tak a nih dawn thu a sawi bawk a ni. (DD)
