CM-in PMJVK kaltlanga sum la dawn loh chhan chu sorkar hmasa huna hna inpek thawh zawh loh tam vang a ni, a ti
CM-in PMJVK kaltlanga sum la dawn loh chhan chu sorkar hmasa huna hna inpek thawh zawh loh tam vang a ni, a ti
21 Aug 2024: Finance Minister Pu Lalduhoma, Mizoram Legislative Assembly pakuana, House Leader ni bawk chuan PMJVK kaltlanga tun sorkara sum la dawn loh chhan chu sorkar hmasa huna hna inpek thawh zawh loh tam lutuk vang a ni tih vawiin fur thutkhawmah a sawi.
Mizoram Legislative Assembly fur thutkhawm vawiina neihah PMJVK chungchang sawizauna neih niin House Leader Pu Lalduhoma chuan he thu hi a sawi a. Hetihlai hian Pu Robert Romawia Royte chuan state sorkarin sum a hmuh sa a release loh vang niin a sawi thung.
Mizoram Legislative Assembly pakuana thutkhawm vawi 3-na hi vawiin chawhma dar 10:30 khan Assembly Speaker Pu Lalbiakzama kaihhruainain neih chhunzawm leh a ni a. He hunah hian District Council & Minority Affairs Minister, Pu C Lalsawivunga chuan zawhna chhangin Sorkar hmasain PMJVK hnuaia project engemawzat a buatsaih sa te chu sorkar tharin umzuiin, sorkar laipuiah thehluh thlak vek a ni tawh tih a sawi a. Project Proposal 64 sorkar laipuiah an thehlut tawh tiin tun Sorkarah PMJVK sanction thar hmuh a la nih loh thu leh PMJVK scheme atanga Vanapa Hall sakna tur Rs nuai 3700 a ruahman chu sorkar laipuiin a la ti fel lo tih a sawi a. PMJVK kaltlanga hmalaknate chu ram tan hmasawnna ruhrel pawimawh dinna anih avangin state sorkar chuan 10% a tum ve tur chu pek chhoh zel a tum tih a sawi bawk.
Thutkhawmah hian Labour, Employment, Skill Development & Entrepreneurship Minister Pu Lalnghinglova Hmar chuan, Labour Cess atanga sum lut chu inhlawhfa te tan tangkai taka hman mek a ni a ti a, tangkai zawka hman theih dan sorkarin a ngaihtuah tih a sawi bawk. (DD)
