22 Aug 2024: Governor Dr Hari Babu Kambhampati chuan vawiin chawhma khan Mizoram Lok Ayukta Member leh Mizoram Public Service Commission (MPSC) member thar te chu rinawmna thu tiam tirin a lalut a. Mizoram Lokayukta Judicial Member ruat thar hi Pu Joel Joseph Denga, MJS Retired niin MPSC Member ruat thar hi Pu K.Lalhmingliana, MCS Retired a ni thung.
Swearing in Ceremony program hi Dr Renu Sharma, Chief Secretary chuan a kaihruai a. Mizoram Lok Ayukta Member leh MPSC Member thar lakluhna Inkhawmah hian Chief Minister Pu Lalduhoma a tel a. Speaker Pu Lalbiakzama, Cabinet Minister te, Minister te, MLA te leh mi pawimawh dangte an tel tha hle a ni.
Lokayukta Judicial Member thar Pu Joel Joseph Denga hian thiamna lamah BA, LL.B degree te a nei a. Ni 24.5.2011 khan Mizoram Judicial Service-ah a lut a, Law & Judicial Department hnuaiah hna pawimawh tak tak a thawh hnuin 12.1.2018 khan District and Session Judge-ah a kaisang a, Lok Ayukta Judicial Member atana ruat a nih lai hian District and Session Judge, Aizawl hna a chelh mek a ni.
MPSC Member thar Pu K.Lalhmingliana hian BSc (Hons) degree a nei a. Dt 01.04.1998 khan Mizoram Civil Service (MCS) ah a lut a, MCS Junior Grade, Senior Grade leh JAG a nih laiin Mizoram hmun hrang hrang leh department hrang hrangah nihna pawimawh tak tak chelhin a thawk kual tawh a. MPSC Member thar atana ruat a nih lai hian Municipal Commissioner, AMC hna a chelh mek a ni.
