22 Aug 2024: Kolasib district a Lirthei enkawltu Joint Action Committee ten National highway kawngpui chhe lutuk avanga vawiin atanga he kawngpui zawh lo tura lirthei khalhtute an ngenna chu vawiin atang khan an kalpui tan, hei vang hian Mizoram lut lirthei a awm lova, hei bakah hian kolasib district chhungah lirthei thahnem tak an tang khang mek a ni.
Hetianga Lirthei khalhtute hmalakna chungchangah hian Kolasib DC chuan a Office chamber-ah Kolasib MJA te chu thil awmdan sawipuiin, Lirthei khalhtute hmalakna hian kan kawngpui siamtu NHIDCL leh an hnuaia contractor te ah nasa takin nghawng a nei tih sawiin, NHIDCL chuan an hnuaia contractor te chu ni 15 chhunga kawngpui khuarte hnawh vek turin hriattirna a pe a, hei bakah hian PWD pawhin an kawngpui enkawl huamchhunga contractor te pawh lehkha an pe tih a sawi a, hei vang hian tun dinhmunah heng contractor te hian an hnathawhna atana an mamawh Lung pawh hmun dang atanga la lut nghalin theihtawpin hma an la chhunzawm nghal tih a sawi bawk.
Hetianga kawngpui a lirthei dan an tum chungchangah hian nizan khan Kolasib DC chuan Lirthei enkawltu Joint Action committee hruaitute chu kawmin, an thil tum chu ram leh mipui tana thil pawimawh tak ni mahse, mipui tana harsatna siam thei leh dan kalh a nih avangin, hma la chhunzawm lo tura ngenin, kawngpui tha kan neih theih nan, an duh ang taka chak taka hma a lakpui theih dan kawng te sawipui bawk a ni.
Vawiin a National highway a motor tlan tur dangtu Kolasib district a Lirthei enkawltu JAC hruaitute chu kolasib district chhung hmun hrang hrang, Vairengte, Rengtekawn, Bualpui leh Kawnpuiah te insem darhin an duty a, hei vang hian state pawn atanga lirthei lo lut a awm lova, kawng laka motor tangkhang erawh engemawzat an awm thung. (DD)
