23 Aug 2024: Vawiin khan Lunglei District Bawrhsap Pu R. Lalṭhazuala hovin a office chamber-ah District Administration, Police, Young Mizo Association (YMA) leh Mizo Zirlai Pawl (MZP) aiawhte’n tun hnaia Borapansury-a Mizo police pahnihin Chakma mipui kut an tawrh avanga YMA leh MZP te’n Lunglei District chhunga Chakma pawn chhuah an khap leh Khawthlangtuipui Group huam chhunga Group YMA te hma lakna chungchangah boruak ṭha zawk a awm theih dan tur an sawi ho.

Tlabung aṭangin SDO (Civil), SDPO Tlabung, Khawthlangtuipui Group YMA President leh Tlabung Sub-Headquarters MZP President te’n Google Meet hmangin meeting hi an zawm bawk.

Lunglei Bawrhsap Pu R.Lalṭhazuala chuan August ni 19, 2024-a Lawngtlai District-a Borapansury khuaa thil thleng chu vanduaithlak a tih thu sawiin, boruak duhawm lo zawk a thlen loh nan sawi ho ṭha tih a nih anga meeting koh a nih thu a sawi a ni.

He hunah hian Lunglei SP mawhphurhna la mektu Pu K.Beihmataosa chuan police lam aṭanga hma lakna report pein, case ziah luh fel anih tawh thu leh dan anga hmalak chhoh mek anih thu a tar lang a. Tlabung SDO (Civil) leh Tlabung SDPO te’n an hma lakna report pe bawkin, YMA Sub-Hqrs Lunglei, MZP Hqrs Lunglei, Khawthlangtuipui Group YMA leh MZP Sub-Hqrs Tlabung President ṭheuh te’n Borapansury thil thleng an duh lohzia lantir nana hma an lak dan leh an dinna an sawi bawk.

Bawrhsap Pu R.Lalṭhazuala chuan Lunglei District chhunga Chakma pawn chhuah khapna lek kawh mektu MZP Hqrs Lunglei leh Khawthlangtuipui Group huam chhunga hma la mektu Group YMA te chu case ziah luh a nih tawh anga dan anga hmalakna kal chho zel tur a nih hre thiam a, boruak ṭha zawk a awm theih nan Chakma pawn chhuah an khapna leh an hrekna chu sut turin a ngen a. MZP Hqrs Lunglei leh Khawthlangtuipui Group YMA te chuan DC ngenna chu committee-ah an lo sawi zui tur thu leh an thu tlukna an hriattir theih tur thu an sawi a ni.

Hetihlai hian nimin vek tlailama MZP Hqrs Lunglei Emergency Meeting chuan Chakma pawn chhuah khap chu tun dinhmunah tih tawp rih nise tiin a rel.

Meeting chuan ni 17 August, 2024-a Mausen leh Tlawng inkara sumdawng lo suamtu Chakma panga(5) te lung inah khung an ni tawh a. Ni 19 August, 2024-a Borapansury-a Mizo Police kutthlaktute chhuina neih mêkah case ziah luh a ni tawh bawk a, hemi bakah hian ‘Magisterial Inquiry’ din anih tak avangin Chakma pawn chhuah khap hi tlai dar 4:00 aṭanga tih tawp rih a rel a ni.

Meeting chuan thuneitute hmalakna chu en zui zela thil tisualtute man vat an nih theih nan a ṭul anga hmalak zel nise tiin a rel bawk a ni.

Mizo Zirlai Pawl Headquarters:Lunglei chuan Chakma pawn chhuah khap chungchanga Mizo mipuite thlawpna chu lawmawm a ti hle a, ram leh hnam humhalhna kawngah theih tawp chhuaha mipuite nena hmalak zel anih theih a beisei bawk a ni.