23 Aug 2024: Vawiin chawhnu lama neih; MZP Hqrs Lunglei Emergency Meeting chuan Chakma pawn chhuah khap chu tun dinhmunah tih tawp rih nise tiin a rel.
Meeting chuan Mausen leh Tlawng inkara sumdawng lo suamtu Chakma panga te lung inah khung an ni tawh a. Borapansury-a Mizo Police kutthlaktute chhuina neih mêkah case ziah luh a ni tawh bawk a, hemi bakah hian ‘Magisterial Inquiry’ din anih tak avangin Chakma pawn chhuah khap hi tlai dar 4:00 aṭanga tih tawp rih a rel a, thuneitute hmalakna chu en zui nise a ti bawk.
MZP Hqrs Lunglei chuan Mizo mipuite thlawpna chu lawmawm a tiin, ram leh hnam humhalhna kawngah theih tawp chhuaha mipuite nena hmalak zel anih theih a beisei a ni.
Hetih lai hian, vawiin chhun khan Lunglei District Bawrhsap Pu R.Lalṭhazuala hovin a office chamber-ah District Administration, Police, YMA leh MZP aiawhte’n tun hnaia Borapansury-a Mizo police pahnihin Chakma mipui kut an tawrh avanga YMA leh MZP te’n Lunglei District chhunga Chakma pawn chhuah an khap leh Khawthlangtuipui Group huam chhunga Group YMA te hma lakna chungchangah boruak ṭha zawk a awm theih dan tur an sawi ho a. Tlabung aṭangin SDO (Civil), SDPO Tlabung, Khawthlangtuipui Group YMA President leh Tlabung Sub-Hqrs MZP President te’n Google Meet hmangin meeting hi an zawm bawk a ni.
