28 Aug 2024: Vawiin khan Aizawl Vaivakawn YMA Hall-ah HIV leh Sex atanga inkaichhawn natna, STI (Sexually Transmitted Infection) chungchang mipui hnena zirtirna beihpui thlak (Intensified IEC Campaign- India Fight Against HIV & STI) Mizorama thla hnih chhung kalpui tur chu Chief Minister Pu Lalduhoma’n a hawng.
Thu a sawinaah Chief Minister chuan, Mizorama kai 60% te hi mipat hmeichhiatna condom tel lova hman vanga kai an ni a, a dang 30% hi ruihhlo ti thin te an ni, a ti.
Tunah hian MSACS chuan HIV kai mi 16,217 vel an enkawl mek a, HIV natna kai hmuh chhuah, an chin hriat zui si loh hi mi 633 an awm a, heng an chin kan hriat zui loh kan thian te hi kan ngaihtuah hle mai a, an hnaih ber ART Centre lo pan theuh turin ka ngen a ni, a ti. Inringhlel kan lo awm a nih chuan rang takin in-test ang u, Baseline survey neihna sum pawh hi Mizoram sawrkarin kan tum tawh dawn a ni, a ti. Nu, HIV kaiin nau a hrin pawhin enkawlna tha tak dawng chunga nau a pai chuan a fa kha a him thei a, nikum chhung pawh khan chutiang naupiang 120 kan neih zinga 118 te chu HIV lakah an fihlim a ni, a ti.
Chief Minister chuan, National Aids Control Organization (NACO) lamin an chhut danin Mizorama puitling 2.73% te hi HIV kai thei dinhmuna ding mekah min ngai a, kan dinhmun hi a him lo hle. Chuvang chuan kan tan tlan a ngai a, kohhran, tlawmngaipawl, Association leh mimal tinte hmalakpuiah ka sawm a ni, a ti a. Vawiina kan hawn campaign hian khawtina chhungkawtin te hnen thleng phak ngei se ka duh a, kan DC leh a thawhpuite zawng zawng pawh tha taka hma lo la ngei turin ka ngen a ni, a ti.
Health Minister Pi Lalrinpuii pawhin, In tin leh khawtin thleng phak campaign neih kan tum ang, a ti a. State Council on AIDS te tuai thar lehin MLA zawng zawng te pawh he hmalaknaa hman tangkai kan tum a, kohhran leh tlawmngaipawlte pawh nasa zawka thawhpui kan tum a ni, a ti.
He campaign hi September leh October thla chhung kalpui a ni ang.
