29 Aug 2024: Mizoram Lokayukta leh MJA Lunglei buatsaihin vawiin khan YMA Sub Hqrs Conference Hall Lunglei-ah Anti – Corruption Awareness Campaign hun hman a ni a, Tlawmngai Pawl hrang hrang aiawh, Zirlai Pawl aiawhte bakah Sawrkar Department hrang hrang aiawhte an tel a ni.
Awareness Campaign hi Pu Lalmalsawma IAS ( Rtd ) Chairperson Mizoram Lokayukta chuah kaihruaiin Mizoram ah March ni 11.2019 khan Lokayukta din tan a ni tiin Mizoram Lokayukta chu Member awm thei turte awm kim tawhin a thawktu lamah erawh chuan kan la famkim lo hle a, hetiang anih avang hian hmalak pawh a la harsa hle; zawi zawia thuam chak mek zel a ni, a ti.
He hunah hian Lunglei Bawrhsap Pu Lalthazuala MCS chuan, Corruption hian hmasawnna a tih khaihlak bakah Sawrkar inrelbawlna tha nei turin a hnawksak a, hetiang anih avang hian mipuite tangrualin kil hrang hrang atangin kan ram ti thuanawptu hi kan do angai a, official te pawhin langtlang tak leh rinawm takin hna thawk ila; mahni atang theuhin bultan kan tum a tul a ni a ti.
Anti – Corruption Awareness Campaign-ah hian Pu Joel Joseph Denga, MJS, Mizoram Lokayukta Member pawhin thu sawiin, Pathian chuan eiru turin min duh lo va, dik taka nung tur leh thamna la lo turin min duh a chutiang chuan nun kan tum a pawimawh a ni a ti.
Pu R.Laltharliana, Assistant Public Prosecutor, Mizoran Lokayukta chuan Corruption awmzia leh ram tana nghawng thalo a neih dan te Official, Tlawmngai Pawl leh mimal tinten Corruption do tura mawhphurhna kan neih dan leh hmalak dan turte kalkhawmte hnenah a zirtir a. Mizoram Lokayukta dinhmun tlangpui tarlangin, Case 65 an neih tawh atangin Case 44 Preliminary Enquiry tih tawh a nih thu leh mi pathum thiamloh chantir an nih tawh thu a tarlang.
Zawhna leh chhanna hun hman a ni bawk.
