Sikul kai ip rit lutuk avanga zirlaite’n harsatna an tawh loh dan tur ngaihtuahin DC hova thutkhawm a ni
02 Sept 2024: Sikul naupangte sikul kai ip (bag) rit lutuk avanga zirlaite’n harsatna an tawh loh nana hmalak dan tur ngaihtuahin vawiin khan Lunglei DC Conference Hall-ah District Bawrhsap Pu R.Lalṭhazuala kaihhruaiin ṭhutkhawm buatsaih a ni.
Lunglei Bawrhsap Pu R.Lalṭhazuala chuan Mizoram sawrkarin April ni 30, 2021-ah sikul naupang bag rit lutuk chhawk zangkhaina tur inkaihhruaina a lo chhuah tawh thu sawiin, Lunglei District-ah pawh a theih chin chinah bawhzui anih rualin, tun dinhmunah engtia kalpui nge ṭha ang tih ngaihtuah turin inrawnkhawm chu buatsaih a ni, a ti.
He hunah hian ip rit lutuk nena ni tina sikul kal ṭhin naupangte hriselnain a tuar theih dan tarlan niin, zangkhai zawka kalpui anih theih dan tur sawiho a ni a. He harsatna sukiang tur hian School Education Department-in April ni 30, 2021-a thu a lo chhuah tawh chu District Education Officer-in government leh private sikul zawng zawngah Mizo ṭawngin thawn chhuak se, tih a ni a. Sikul tinah lekhabu dahna (bookshelf) neih theih dan tur ruahman ni se tih a nih bakah, sikula zir hunbi (routine) mila lehkhabu thlak lova lekhabu zawng zawng ken vek chuan bag a tih rih zual avangin routine anga lehkhabu ken turte chu nu leh pate’n enpui bakah, zirtirtute’n an subject mamawh chauh keng tura hrilh hriat ni se, tih a ni.
Sawrkar inkaihhruaina angin ni khatah Class I & II tan subject 3, Class III – V tan subject 4, Class VI – X tan subject 6 angin kalpui ni se; homework pek chungchangah ni tin primary school-ah subject 1, middle School-ah subject 2 leh high school & higher secondary school-ah subject 3 aia tam pek loh ni se, tih a ni bawk.
He hunah hian sikul tinah zirlaite’n tui in tur thianghlim leh hnianghnar an neih theih nan ruahmanna siam ni se, tih a ni a. SCERT-ah sikul exam term khata zir tur ang zela zirlaibu siam tura thlen rel a ni bawk.
Vawiin ṭhut khawmah hian official lam – DEO, DCPO, DPO(WCD), SDEO North/South te, tlawmngai pawl, zirlai pawl leh zirtirtu pawl hrang hrang hruaitute leh private leh kohhran sikul hrang hrang ai awhte an tel a ni.
