04 Sept 2024: Vawiin tlai khan Central YMA hruaitute chu NHIDCL Executive Director Virender Kumar Jakhar Office ah lengin an inkawm a. Mizoram chhunga NHIDCL hnuaia kawngpui laih mek leh harsatna awm te sawiho a ni.
Central YMA hruaitute chuan Sub-Hqrs YMA hrang hrang hruaituten an huamchhung theuhva NHIDCL hnuaia kawng laih meka harsatna awm te an sawipui a. Aizawl- Tuipang Road- a Khumtung leh Serchhip inkara kawng siam tha lo leh Side Drain siam tha lo te sawipui a ni a; Lunglei – Tlabung inkar kawng siam mek chak zawka hma la tur te; Saitual- Saichal Road (NH102 B Diversion) a leivung paih fimkhur loh avanga harsatna awm te, leivung paihna tur (Spoil bank) ah chauh leivung paih tur te, Kawnpui – Kolasib inkara NHIDCL enkawl kawng siamthat chungchang te leh hmun hrang hranga kawngpui laih mek te sawipui a ni.
NHIDCL Executive Director Virender Jakhar chuan kawngpui laih mek chungchang leh dinhmun te CYMA hruaitute hi a lo hrilhfiah a. Spoil- Bank ni lo a leivung paih awm te chu enfiah a hmalak zui a tum thu te, Lunglei- Tlabung inkar kawngpui chu kumin December ah chuan zawh deuh vek a nih tawh tur thu te a sawi a. Saitual – Saichal inkar kawng leh hmun danga an hmalakna te a sawi bawk. Central YMA puihbawmna a ngen nghal bawk.
Central YMA hruaitute chuan Mizoramin kawngpui tha kan neihna tura hnathawh kal mek chu tluang taka a kal zel theihnan Contractor-te pawh puih an inhuam thu an sawi a, chutihrualin dan ang thlapa hnathawh anih theihna tur te, tha tak leh tlo ngei tura hnathawk turte leh leivung paihna turte pawh a paihna tur ngeiah paih anih zel theihnan NHIDCL hotuten Contractor te hnathawh enpui zel turin an chah a ni.
Inkawmnaah hian Central YMA hruaitute hi President Pu Lalhmachhuana bakah Prof. Malsawmliana, General Secretary; Pu Fabian Lalfakawma, Assistant Secretary; Pu MS Ralte Finance Secretary leh Pu SF David Ngursangzuala CEC te an tel.
