Kawngpui sir a lirthei dah ngaite chu a dahna hmun Local Council-in a ruahmanah man chawia dahtir ni se, an ti
06 Sept 2024: Vawiin khan Lunglei Municipal Council (LMC) Board of Council Hall, Convention Centre, Lungleiah LMC hotute leh Lunglei khawpui chhunga Local Council hrang hrang ai awhte’n veng chhung kawngpui dunga lirthei dah leh riahte hnen aṭangin lirthei hun man (parking fee) lak dan tur an sawi ho.
He hun hi LMC Vice Chairman Pu K. Lalrinawma’n kaihruaiin, LMC area chhunga kawngpuite a lo thawl zawk nan leh mipuite an lo him zawk theih nan te, kawngkama lirthei dah avanga lirthei chetsualna awm ṭhin a lo ziaawm theih nan tea LMC leh Local Council hrang hrangte’n parking chungchanga ruahmanna an siamte thlir ho va, a hmawr bawk turin meeting chu koh a nih thu a sawi.
LMC hotute leh Local Council ai awhte chuan veng chhung kawng kama lirthei hun leh a man lak chungchanga an ngaih dan hrang hrang sawi hovin, kawngpuia lirthei dahte chu Local Council te’n a dahna nei tura hriattir nawn ni se, loh theih lohva dah ngaite chu a dahna hmun Local Council-in a ruahmanah man chawia dahtir ni se, an ti a. Lirthei hun man atan hian thla khatah ke hnih nei tan ₹ 500/-, ke thum nei tan ₹ 700/-, lirthei te chi (LMV) tan ₹ 1,000/- leh lirthei lian (HMV) tan ₹ 3,000/- te bithliah a ni a. Hemi dan piah lama chete chu LMC inkaihhruaina dan angin a vawi khatnaah ₹ 1,000/-chawitir ni se, tih a ni a.
He ruahmanna hi September ni 25, 2024 aṭanga hman ṭan tum a ni. Local Council huam chhunga lirthei dahna hmunte chu rawng vara chhinchhiah (line rin) ni se, chhinchhiahna ziak ṭha tak (signage) tar ni bawk se, tih a ni a. Lirthei dah man hi thla thar ni 10 hmaa khawn a, theh luh ṭhin tura ruahman a ni a. He’ng ruahmanna siamte hi LMC-in thu chhuah siamin an la nem nghet leh dawn a ni.
