19 Sept 2024: India ram puma chawlhkar hnih chhung awh tur faina beihpui thlak, Swachhata Hi Seva 2024 kalpui mekah vawiin khan Urban Development & Poverty Alleviation (UD&PA) Department, Lunglei leh YMA Branch Rahsi Veng leh Lunglei District Adventure Club te ṭangho chuan Rahsi Veng leh Sazaikawn inkar kawngpui thlanga bawlhhlawh paihna hmun ni lova bawlhhlawh paihte an thian fai.
Rahsi Veng leh Saizaikawn inkara a paihna hmun ni lova bawlhhlawh paih (Rahsi Veng CTU) then fai hi Swachhata Hi Seva 2024 puala District Steering Committee-in Lunglei khawpui huam chhung (urban area)-a vantlang hmunhma thenfai ngai bik a ruahman pariat zinga pakhat a ni. Lunglei District Urban Development Officer (DUDO) Pu C.Sawihlira hovin thenfai hnatlang hi thawh a ni a, UD&PA Lungleia thawktute, Rahsi Veng Branch YMA member-te leh LDAC member-te aṭangin mi 60 chuang an thawk chhuak a ni.
Lunglei khawpui chhungah mahni veng chhung bawlhhlawh paih ruala paih lo, a hranpaa mahni remchan dana bawlhhlawh paih leh khualzin veivak lirthei aṭanga bawlhhlawh paih mai ṭhin an la awm avangin bawlhhlawh paihna hmun ni lova bawlhhlawh paih hmuh tur mit tikham tak tak eng emaw zat a la awm a. UD&PA chuan heng hi a remchan dan anga thian fai tura ruahmanna siamin, tun Swachhata Hi Seva kalpui mekah pawh hian he’ng a paihna hmun ni lova bawlhhlawh paihte hi then fai mek zel a ni a. Mahnia bawlhhlawh paih ṭhinte pawhin Hauruang kawng, Riangvai Thlanmual bula a paihna hmun tura thuneituten an ruahman (dumping ground)-ah chauh paih ṭhin turin department chuan mipuite an ngen a ni.
Swachhata Hi Seva 2024 kalpui mekah hian UD&PA Lunglei leh LMC ṭang kawp huaihawtin September ni 17, 2024 khan Lunglei khawpui chhunga Local Council tinin veng chhung thenfai hnatlang an lo thawk tawh a. September ni 18, 2024 khan UD&PA leh Baptist HSS NSS te chuan Lunglei Zotlang CTU-ah kawng dunga bawlhhlawh thenfai hnatlang an lo thawk tawh bawk.
