19 Sept 2024: Vawiin chawhma dar 11:30 khan Mizoram Sawrkar Flagship programme ‘Bana Kaih (Handholding) Scheme’ chu Chief Minister Pu Lalduhoma’n Vanapa Hall, Aizawlah a tlangzarh. Scheme book pahnih ‘Bana Kaih Mizoram Handholding Scheme’ leh ‘Thlai thar hralh dan tur kaihhruaina tawi’ bakah Digital Portal a hawng nghal bawk.
Pu Lalduhoma chuan, hun rei tawh tak atanga an suangtuah tawh thin ‘Bana Kaih Scheme’ tlangzarh a ni ta chu lawmawm a tih thu sawiin, policy a hlawhtlin theih nana theihtawp chhuahtu leh thlawp tlat thintute inpekna ropui a tih thu a sawi a. Thlai thar 4 lei nan sum dah fel a nih thu leh society kaltlanga lei tura ruahmanna duan a nih thu te sawiin, society chu politics tel lo, hruaitu tha leh mi thahnemngaite kaihhruai a ni tur a ni, a ti. Rate tha zawk Rs 50/- chunglama sawhthing hralh theite chu sawrkarin a buaipui dawn lova, Rs. 50/- tling lova an hralh erawh chuan a tlin lohna zat kha sawrkarin a hnawhkhah sak thung ang a ti.
Bana Kaih Scheme hi thawkrim leh taimate tana siam a ni a, hmelhriat leh insawipui hmanga hmuh ve mai theih a ni dawn lo CM chuan tiin, Implementing Department hnuaia Search Committee te’n endikna an kalpui hnuah chauh Progress Partner-te thlan an ni ang, a ti. Progress Partner te tan sawrkar chu quarantor-ah a tang ang a, loan rul thate chu an loan interest sawrkarin a pe let leh vek ang, rul tha lo te erawh chu bank in dan a siam anga an chunga hmalak a nih bakah a tul angin Handholding portal-ah an hming tar chhuah a ni ang. Handholding Loan component atan hian SBI, MRB leh MCAB nena thawhhona ziah phawt tur a ni, tiin an kal dan tur tlangpui a sawi bawk.
Chief Minister hian, Bana Kaih Scheme chu Mizoram sawrkar flagship a nih avangin implementing department-ten an hna ngaihpawimawh hmasakah an nei tlat tur a ni a. MLA te pawh an bial chhungah theuh tha taka kalpui a nih theih nan tan lo la turin a chah a ni.
Thusawitu dang Agriculture & Farmers Welfare Minister Pu PC. Vanlalruata, Chairman, Mizoram Agricultural Marketing Board chuan, vawiin thleng hian thlai thar lei sak theih tur mi 45585 vel portal-a ziah luh an ni tawh a, an zinga Sawhthing chingtu inziaklut tawh 25,154 atangin quintal 10,84,975; Aieng chingtu 3,414 atangin quintal 77,492; Hmarchate chingtu 8,517 atangin quintal 36,774 leh Hmunphiah chingtu 8,500 atangin quintal 1,20,000 thar chhuah beisei a ni, a ti. Marketing bakah link road-te ngaihpawimawh tel an tum thu a sawi bawk.
Chawhnu dar 2:00 khan Sawrkar hnathawk Deputy Secretary leh a chunglamte bakah SDO (C) leh BDO te pualin thlai thar lei tur chungchang inhrilhhriatna hun hman a ni.
Bana Kaih Scheme hmang hian hmasawnna tlo leh tluantling (sustainable development) hmanga Mizoram chu ram changkang (developed state) a hlankai tum a ni a. Apex body chu CM kaihhruaina hnuaia din Mizoram State Policy Coordination Committee (MSPCC) niin Nodal Department chu Planning & Programme Implementation Department a ni a. Bana Kaih (Handholding Scheme) hnuaiah hian Implementing Department 16 awmin, component 5 a awm ang.
