21 Sept 2024: Mizoram Oil Tanker Drivers’ Association (MOTDA) leh Petroleum Entrepreneurs and Transporters Union of Mizoram (PETUM) te chuan duhthusamin kawmpui siamthat la ni chiah lo mah se, Mizoramin tuialhthei-ah harsatna a tawh nasat tak avangin tuialhthei phurtu lirthei a tlan ngam leh tlan theite chu tlan tawh mai ni se, an ti.
Hemi chungchangah hian nimin khan thuchhuah siamin tuialhthei phurtu pawl pahnihte chuan National Highway 306, Kawnpui leh Sairang inkar kawngpui siamthat mek chu kawng khuar zualpui laite hnawh that ni tawh mah se, tuialhthei phur lirthei tlan nan duh thu a la sam lo hle, an ti a. Kawngpuite siamthat mek ni mah se Mizoramin tuialhtheiah harsatna a tawh nasat avang leh mipui mamawh a rang thei ang bera phuhruk anih theih nan tuialhthei phur tlan thei leh tlan ngamte chu tlan tawh mai se, an ti. Hetih rual hian kawngpui chhia siam meka hmachhawp la awm te chu rang taka thawh chhunzawm anih theih nan sawrkarin hma a lak chhunzawm zel an beisei thu an tarlang bawk.
