IBPS exam paltlang thei kan nei mang tlat lo, tiin zirtirtuten chonaa ngai turin CM-in a chah
26 Sept 2024: Vawiin khan Serchhip Teachers’ Association (STA) te chuan Serchhip Auditorium-ah General Assembly leh an Golden Jubilee lawm kharna te, MLA Trophy (Inter School Challenge) lawmman semna te an buatsaih a, Chief Minister Pu Lalduhoma’n a hmanpui.
Chief Minister chuan, Mizoram sawrkarah hna ruak hi tlem mahse India sawrkarah erawh chuan luh theihna a la tam reng thung a, kan thiamnain a tlin phawt chuan SSC te, Railway Recruitment Board te, IBPS lamah te hna a la tam hle, a ti. Hei rel kawng a rawn tlang tawh a, kan rail station enkawltu tur Mizo thalai Railway Officer leh staff tam tak kan mamawh dawn, a ti a. MRB Manager tur Mizo thalai pawh hi kan mamawh tam hle, mahse, IBPS exam paltlang thei kan nei mang tlat lo tiin, heng kan harsatna tawh mekte hi zirtirtuten chonaa ngaiin thalai tha zawk, taima zawk leh tumruh zawk min chherchhuahsak lo tum ang che u, a ti. Heng exam-a tling tawhte hian kan zirna system te, kan syllabus te an dem ngai lo, tih tak takna nena beitu an tlem lutuk hi mang tiangtu zawk a ni, a ti.
Chief Minister chuan, Central subordinate staff leh banking exam hrang hranga Mizo thalaite an tling hlei thei lo hi kan zirtirtuten chonaa ngaiin, tling zo ngei tura buatsaihna lamah tan la turin ka sawm che u a ni, a ti.
Sawrkarin mahnia eizawnna tur din lama theihna neite tana hmalakna tur Handholding Scheme hnuaia a awm tur thu te, sports lama talent nei thate dap chhuah leh chung naupangte tanpui zui zel a tul thute a tarlang bawk.
STA hian Serchhip mipuite tan hna tha tak tak a thawk tawh thin a, India rama ziak leh chhiar thiam tamna ber district kan nih theihna chhan pawh hi zirtirtute thawhrimna vang a ni, a ti. Kan ram hian hma lam kan pan zel theih nan thangthar tha zawk kan din a ngai a, chu chu rilrua vawng chungin theihtawp i chhuah zel ang u, tiin a sawm a ni.
Inkhawm hi Pu VL Chanchinthahrilmawia, President, STA in a kaihruai a, Pi C.Krosthangi’n hunserh a hmang a, chawhnu lamah hruaitu an thlang a ni.
