Lunglei leh Aizawl inkara tlan Maxi-Cab Welfare hruaitute’n rate an tihsan chungchangah Lunglei DTO an hmu
27 Sept 2024: Lunglei leh Aizawl inkara tlan Maxi-Cab Welfare hruaitute chuan tunhnaia rate an tihsàn chungchangah vawiin khan Lunglei District Transport Officer (DTO) Pu Beitlotha Nohro chu a office-ah hmuin; rate an tihsàn chhan sawiin, Sawrkar-in pawmpui ngei se an duh thu an hrilh.
Maxi-Cab Welfare hruaitute hian tun hnaia Lunglei DTO-in State Transport Authority (STA) rate siam aia sánga passenger phur chi lirthei tlan te chu hrem an nih tur thu thuchhuah a siam chu Lunglei leh Aizawl inkara tlan Maxi-Cab Welfare te hriattir an nih ve loh avanga mak an tih thu an sawi chungchangah Lunglei DTO chuan welfare tam tak an awm a,tumah a hranpaa hriattir an nih loh thu leh Owners’ Association leh ZDU te erawh an hriattir tih a sawi a; Sawrkar rate siam anga an tlan theilo a nih chuan thuneitute hrilh hmasak leh an duhdan thlen hmasak chu thil tih hmasak tur a nih thu leh fuel (petrol/diesel) man sáng avanga mahni thu thu-a rate tihsàn emaw tlan duhloh emaw chu thil kalphung a nih loh thu leh an duh a nih chuan Consumer Forum-ah pawh complain theih a nih thu Maxi-Cab Welfare hruaitute hi a hrilh a ni.
Hetih lai hian Maxi-Cab Welfare hruaitute hian Lunglei leh Aizawl inkara tlan Maxi-Cab te chu route hrang hranga service-te aia STA rate siam zawm \ha ber an nih thu leh route danga tlan zawng zawngte pawh STA rate siam aia sánga an tlan laia Lunglei leh Aizawl inkara tlan te’n rate an tihsàn chauh ngaihmawh a ni chu an hriatthiam loh thu an sawi rualin, rate an tihsàn chhan chu fuel man sàn vang leh kawng chhiat vang bakah counter lamin ticket pakhat zelah 10% an ei bawk vang niin an sawi a; tuna mi pakhat chuan man Rs 700 an tih hian counter lamin Rs 70 zel an ei bakah tunhmaa diesel Rs 2,700 bâwr vela an up- down theih laiin fuel man sàn hnuah chuan Rs 3,500 atanga Rs 4,000 vela an up-down thu an sawi bawkin, counter lamin an ei tur tal Sawrkar-in a tihniam lo a nih chuan Rs 600 per head-a tlan leh chu harsa an tih thu an sawi a. Sawrkar-in Lunglei leh Aizawl inkar chu km 167 anga a sawi laiin counter to counter an tlan avangin km 173 tlan ang an nih thu Maxi-Cab Welfare hruaitute hian an sawi a ni.
Lunglei DTO hian Maxi-Cab Welfare hruaitute chu rate tihsàn an duh dan leh an duh chhan mumal tak chu ziaka a hnena thlen tur leh an thu thlen chu STA lamah thlensak a tum thu hrilhin,hemi chhung hian rate pangngaia tlan duhte chu an tlan theih reng thu leh rate pangngai aia sáng erawh chuan tlan a remchan loh thu a sawi a. Maxi-Cab Welfare hruaitute pawh hian Sawrkar-a an duhdan an thlen te an ngaihchan chhung chu tumah Lunglei leh Aizawl inkara Service Maxi-Cab te tlan rihlo an tum tih an sawi ve bawk a ni.
Lunglei to Aizawl, Aizawl to Lunglei Service Maxi-Cab Welfare hruaitute hian vawiin chawhnu vek khan rate tihsàn an duh chhan hrang hrangte hi ziakin Lunglei DTO hnenah hian an thehlut nghal a; rate diklo-a an tlan avanga MVI lamin nimina an Driving Licence an mansak te pawh nimin khan pêklêt leh an ni.
