01 Oct 2024: Vawiin khan Chief Minister Pu Lalduhoma chuan Serchhip Sports Complex-ah Serchhip District Secondary School Sports Meet 2024 a hawng. Zirlai naupang 1,000 vel kalkhawmte chu ruihhlo laka fihlim ngei tur leh nun kawng pangai tak zawh tlat turin a chah a. “Nakin lawka Mizoram la enkawltu turte in ni tih inhrereng rawh u” a ti.
Chief Minister chuan, Sawrkar hnaah kan vaia luhna tur a awm loh avangin kawng danga talent tha tak tak neite chuan lo tipung ula, lo bei zel rawh u, talent hai chhuah kawngah pawh tan ila zel ang u, a ti. Kan thalaite hi sawrkar chuan a thlahthlam ngai dawn lo che u a, infiamna hmunhmate pawh a theih ang angin kan thuam tha chho zel dawn, tiin Serchhip Sports Complex pawh hi mi inphalten infiamna hmun atana an pek a ni a, an pek ang takin infiamna ruhrel tha tak tak sak nan kan hmang zel ang, a ti. CM chuan, tunlaiin sualna a pung nasa a, Serchhip khawpui ngei pawhin kan tuar hle tih kan hria, nangni zirlai naupang duhawm tak tak te hi chuan pangai takin in nun rawn hmang ang che u, a ti. Mi chungchuang nih a har a ni thei, mi pangai nih erawh chu thil harsa a ni lo, nun kawng pangai tak zawh ula, in taksa, in rilru leh in thlarau tan thlengin chu chu malsawmna a ni dawn a ni, a ti.
Sports meet hawnna inkhawm hi Pu David Laldintluanga, Chairman, Serchhip District Secondary School Sports Committee chuan a kaihruai a, Pu Richard Lallawmkima, Asst. Secy, SDSSSC chuan report a pe a ni.
Infiamna mipa tan chi 19 leh hmeichhe tan chi 17 a awm dawn a, sikul 19 atangin infiammi 600 vel an fuankhawm a. Zirlai naupang kalkhawm zawng zawng hi an vaiin 1,000 vel an ni.
