Mizoram chu India rama ramngaw (forest cover percentage) a ram zau zawng atanga tehah a sang ber
03 Oct 2024: Vawiin chawhma dar 11:00 khan I&PR Conference Hall, Lianchhiari Run, Aizawl-ah Pu Lalthansanga, Environmental, Forests & Climate Change Minister hovin 70th National Wildlife Week, 2024 hawn a ni.
Khuallian chuan Mizoram-a thil awm reng reng hi hmangaih tura chahin kan sakhua Kristianna nen pawh a inzawm tlat avangin kan ramngaw leh nungchate kan humhalh sauh sauh a pawimawh a, an tel lo chuan kan damkhawchhuak thei dawn lo a ni tih hre tlang ang u a ti. Dan palzutna avanga nungchate’n an tuar thin chu pawi tiin danin a phal bak sumdawnna kalpui thin chu kan hnualsuat a, dan palzutna do turin department chauh ni lovin kan tlawmngai pawlte nen kan tan ho a ngai takzet bawk a ni, a ti.
Forest Minister chuan ramsa pel chingte chuan sima an awm ang anga awmtir mai chu ramsa humhalhna tha ber anih thu sawiin, an chenna ramngaw tichereu lo tur leh ei leh bar kan zawnna kawngah pawh nungchate chunga zahngaihna lantir tura chahin, a Week chhung chauh ni lova kumtluana ramngaw leh nungchate humhalhna kawnga tan la turin a sawm bawk a ni.
He hunah hian Pu Ashok Kumar Biswal, IFS, PCCF chuan keynote address pein, Mizoram chu India ramah ramngaw (forest cover percentage) a ram zau zawng atanga teha a sang ber dinhmun 84% lai a ni chu lawmawm tiin chhawmnung zel turin a chah.
Pu Agni Mitra, IFS, Field Director, Dampa Tiger Reserve chuan tun dinhmunah Mizoram-ah Protected area 11 awmin Sahel ei chi (Carnivores) 10 an awm mek thu a sawi.
Kumin National Wildlife Week thupui hi “Wildlife conservation through Co-existence” (Inngeih taka khawsa tlang chunga nungcha humhalh) tih niin Wildlife Week hian October Ni 8 thleng a awh ang.
