MCVU huaihawtin tukin dar 6:00 atang khan tuialhthei man sang avangin lirthei hrang hrang an ding
23 Oct 2024: Sumdawng lirthei neitute intelkhawm Mizoram Commercial Vehicle Union (MCVU) huaihawtin tukin dar 6:00 atang khan tuialhthei man sang avangin lirthei hrang hrang an ding a, tlai dar 6:00 thleng an ding ang.
Zawhna chhangin MCVU hruaitute chuan vawiina lungawilohna an lantir chu an hlawhtling thawkhata an hriat thu an sawi a. Tuialhthei man tihhniam an nawr chhan chu khawvel kalphungah lirthei chuan man leh hman man a to zel tih sawiin mipuiin an tuar nghal zel an ti a. Mipuiin an tawrh lohna turin Mizoram sorkarin tuialhthei man an tihsan chu tawlh hret se, lirthei chuan leh hman man tih to a ngai lovang a, mipuiin an tuar lo thei ang tih ngaihtuahna nena lungawilohna chu lantir an nih thu an sawi.
MCVU hruaitute chuan taxi leh two-wheeler taxi te tlan luia an thlawp ve lo chu mak an tih thu an sawi a. Lungawilohna an lantir chungchangah dan leh thupek kengkawhtute leh mipuite atanga harsatna engmah an tawh loh thu an sawi a. Khualzin veivak tur harsatna tawk tlem azawng chu an awm thu sawiin; damlo leh rikrum thila veivah ngai erawh an dan loh thu an sawi a ni.
Thudawn danin vawiina lungawilohna lantir avang hian bus chuang thin school naupang school pan tur eng emaw zatin sorkar bus tlan lohna kawngah chuan harsatna an tawk a. Transport department bus tlanna kawngah pawh sorkarin tlantir mahse bus a chuan tum tam takin nidang aiin bus an chang rei thin hle nia thudawn a ni.
Vawiina sumdawng lirthei nuar tur avang hian mipuite harsatna sutkian nan Mizoram sorkar chuan MST Bus 14 khawpui chhungah a tlantir a. Zing dar 7:30 atanga tlai dar 5:00 thleng sorkar bus te hi an tlan dawn a ni. (Akashvani Aizawl)
