31 0ct 2024: Tunhnai a ram ngaw atanga mihring chenna hmuna zawng chhuak chu Environment, Forest & Climate Change department-in report an dawn hnuhnun’ berah Samlukhai khua bawrah a awm tih an sawi.
Vawiina Akashvani palaiin a kawmnaah Deputy Conservator of Forest (Wildlife) Pi Margaret Lalramchhani chuan zawng chhuak chu a tirah chuan Dampa Tiger Reserve West Phaileng bul vel atangin a chhuak, a hnuah Dapchhuahah an hmu leh a, a hnuah Sairang bawrah an hmu leh tih a sawi a. Chhim pheia an hmuh chhunzawm nen zawng thuhmun a ni em tih an hre lo ni-in a sawi a, report an dawn hnuhnung berah chuan Samlukhai bawrah an hmu tih a sawi a ni.
DCF chuan zawng chhuak chu mipui a tihbuai lem loh chuan sahuana dah luh a nih dawn loh thu a sawi a. Sahuanah a hranga dah bikna tur a awm lo a, zawng awmsa a tam a, awm thar a awm hian an lo tihhlum deuh tlangpui avangin dah ngam a ni lo a ti a. Ramhnuaia a luh leh theih an duh ber avangin va tihbuai loh an duh ber tih sawiin DCF chuan mipuite chu eitur lo pe lo turin an ngen tih an sawi a, dawhthei taka lo tina lo chhunzawm zel turin an chah tih a sawi ni.
Pi Margaret Lalramchhani chuan ramsa reng reng chu han mana bawma khungin capture myopathy an tih, khungbeh an nih avanga rilru na leh buai avanga chaw ei thei lo, thi ta mai a tam hle a, hei vang hian department chuan man kher an tum rih lo a ti a. Hetih rual hian mihringte a tibuai a, a ti na a nih chuan hma lak nghal an tum thung tih an sawi a. Mihringte a tihnat an nghak tihna ni lovin mipui tana a hlauhawm theihna thil thleng a awm a nih chuan department hriattir nghal turin a chah a. Mipui atanga harsatna tawk in report an la awm loh thu sawiin report a awm thulha che nghal thei turin ruahmanna erawh an siam tih a sawi a ni. (AIR)
