“Kan hna hi kan rawngbawl nana Pathian min hunna a ni a, kan ngaipawimawh ber tur a ni” -CM
08 Nov 2024: Vawiin khan Administrative Training Institute Auditorium ah Mizoram Secretariat Service Association ten an Conference vawi 19 na an hmang a, Chief Minister Pu Lalduhoma’n a hmanpui.
Chief Minister chuan, MSSA hi sawrkar hnathawktu pawimawh tak, department tina inzarhpharh in ni a, Sawrkar inenkawlna dan lam pawh in hre tlang hle a, ram rawngbawlna tangkai tak thawktute in ni, a ti.
Kalphung tha zawk duha lo au thin kan nih ang ngeiin kan sawrkar hian mipuite tana rawngbawlna tha lehzual siam tumin hmalakna kan nei ta nual a. Hengah te hian sawrkar hnathawkten tha taka min thawhpui kan beisei. Tin, hnathawktu tha kan neih theih nan department tinah Service Review Committee kan dintir bawk a. Hnathawk thei lo emaw thawk tlak lo te dap chhuak a, a tul anga dan anga insingsak kan tum a ni. Sawrkar hnathawkte service quality a that hian kan ram quality a tha dawn a ni, a ti.
Pawl leh kohhran lamah sawrkar hnathawkte kan inhman nasat lutuk hian kan nitin hnain a tuar ve thei a, thawhpuite kep ngai reng, mahni thawhna hmuna hmuh harsa tak kan ni ang tih te hi a hlauhawm. Kan hna hi kan rawngbawl nana Pathian min hunna a ni a, kan ngaipawimawh ber tur a ni, a ti.
Reilote sawrkarna kan chelh chhungin Service Association hote hi ka hmu kim deuh vek tawh a, Service rivalry hi a nasa hle mai tih ka hmu. Hei hi tihdal ka duh a, thawkho vek kan ni a, kan hnain a tuar ang tih ka hlau thin a ti. Kan hnathawk hnuaihnung lam te hmathatna hi i ngaihthah lovang u, post ruak hnawhkhah kawngah pawh a hnuailam a kawrawng lutuk niin kan hria. Hei hian nakin zelah harsatna min siam thei a ni, a ti a. Sawrkar flagship programme Handholding chu ngaihpawimawh hmasaa lo nei zel turin a chah bawk.
MSSA hian tunah hian sanctioned post 260 neiin Officers member 261 an awm mek a ni.
