14 Nov 2024: Nov 14 – 16, 2024 chhung awh tur Leitlangpui Music Festival chu vawiin chawhma lam khan Kawmzawl, Pukpuiah tan niin; Tourism Minister Pi Lalrinpuiin a hawng.
Leitlangpui Music Festival hawnna inkhawmah hian Minister Pi Lalrinpuii chuan, kalphung thar Sawrkar kan han nei ta a, Tourism lamah pawh kalphung thar – “Change” kan siam nghal a. Department-in Festival kan huaihawt thin chu ennawn niin, mipuiten an ta neih theih tur festival nei thei hram ila, a huaihawt vel pawh sawrkar department-in buaipui tawh lovin, tender hmangin outsource thin ila tiin ruahmanna thar kan han siam a. Mipuite ta neih theih ngei tur Festival kan han dap a, “Serkawn Concert” a lo ri chhuak ta a, Zosap Missionary Pu HW Carter-a, Mizo ten Zochhawni Pa tia kan kohin, kum 1930 chho vela midangte tiphur thar a, Thu leh hla lama harhtharna a lo thlen chhoh dan leh 1932 favang awllen laia hlawhtling taka Serkawn Concert an lo huaihawt chhoh dan-te kan han hre thar leh ta a, “Serkawn Concert” chu kum 90 liam hnuah chawivul thar leh turin hma kan han la ta a ni, a ti.
Tourism Minister chuan Music lama tuimite chuan he hun hi rawn hmang tangkai rawh u, in hman tangkai tura buatsaih a ni si a, in hman tangkai loh chuan he music festival hi a hlawhtling ngai dawn lo, a ti bawk.
Vawiin Leitlangpui Music Feltival tan ni ah hian chawhma lamah Hnam lam chi hrang hrang, Zaipawl, Mal zai leh Special item thahnem tak entir niin chawhnu lamah Concert-in chhunzawm a ni a, naktuk ni 15.11.2024 chawhnu dar 12:30 ah Beat Contest-in hun hman chhunzawm a ni ang.
