18 Nov 2024: Vawiin chawhma khan I&PR Auditorium-ah National Press day 2024, kumtin 16th November a hman thin chu remchan zawkna avangin hman a ni a, I&PR Minister Dr Vanlalthlana chuan khuallian niin a hman pui. Kumin National Press Day Program-ah hian I&PR Minister chuan Mizoram Sawrkarin Journalist pension a duan thar chu tlangzarh nghalin Journalist Pensioner mi 8 (pariat) hnenah Journalist Pension Book a hlan nghal.
National Press Day 2024 puala thuchah sawiin I&PR Minister Dr Vanlalthlana chuan tunlai khawvelah Technology-ah hmasawnna nasa tak awm mahse Journalist pawimawhna leh mawhphurhna a tlahniam chuang lova. Amaherawh chu, khawvel hmasawn zel leh thiamna thar mil turin journalist te chu an intahhriam chhunzawm reng a ngai thung a ti.
MJA te chu thudik leh tan lam neilo, huai taka an thil hriat te chhuah zel tur leh ram tana an mawhphurhna pawimawh tak te hre reng turin a chah a. Thil chik, dil chhut leh hnuchhui kawngah Journalist te chu tan la chhunzawm zel turin a chah bakah RTI hmang tangkai chhunzawm turin a chah tel bawk.
Mizoram Journalist Pension Scheme 2023 hi Mizoram sawrkar chuan Gazette kaltlangin 05.10.2023 khan a ti chhuak a. He pension scheme hnuaiah hian India khua leh tui dik tak, Mizorama chhung mi leh sa, Journalist hna kum 30 tal thawk tawh chuan kum 60 a tlin veleh, ama duh thu angin Journalist Pension hi a dil thei a ni. Mizoram Journalist Pension Scheme hnuaiah hian Pensioner hian Rs 8500/- thlatin, thlabi hlawh a la thei a ni.
National Press Day 2024 puala Program hi Pu C.Lalnunkima, Director, I&PR chuan a kaihruai a. He hunah hian Pu C.Lalrambuatsaiha, President, MJA hnen atangin Nation Press day 2024 puala thupui.”Changing Nature of Press” tih hmangin infuihthar lehna thuchah tha tak ngaihthlak a ni a. Jounalist kalkhawmte hmaah Dr David C.Vanlalfakawma, Department of Forestry, MZU chuan “ Journalism in the face of the environmental crisis”, tih thupui hmangin kan chhehvel borual, leilung, nungcha leh ramngaw chereu mek zelah Journalist te hma an lak a tul zia thiam takin a sawifiah bawk a. Pi Mina Zoliani, Joint Director, I&PR chuan lawmthu sawiin huntawp a khar a ni.
