10 Dec 2024: Vawiin chawhma khan Baptist Centre, Falkland, Aizawlah Mizoram Middle School Teachers Association(MSTA)chuan General Conference 2024 an nei a. He hun hi Education Minister Dr Vanlalthlana chuan khuallian niin a hmanpui.
School Education Minister chuan Middle school zirlaite chu uluk leh zuala enkawl an ngaih hun lai tak tih a sawi a. Hemi kum chhovah hian an rilru nasa taka a danglam avangin zirtirtute chu an hringnun kaihruaitu an nih a ngai a. Digital exposure an neih chhoh tak tak hun a nih bawk avangin smartphone leh social media hman dan te pawh uluk taka kan hrilh hun lai tak a ni, a ti. Zirlai zirtirtu ringawt kan ni lo a, hringnun zirtirtu kan ni tel a ni tih kan hriat thar ka duh a. – An ‘academic career’ kaihruaitu kan nih piah lamah, an ‘life career’ kaihhruaitu pawimawh tak kan ni a ti. School Education Minister chuan Zirtirtute tan intuai thar reng a ngai a. Class kan zirtir leh naupang kum kan enkawl chu a ngai deuh reng a nih pawhin generation an danglam ang zelin thil a danglam thin a. 21st Century khawvelah hian khawvel hmasawnna hi a kal chak em em a ni, a ti.
MSSTA Conference Program hi thenhnihah then a ni a, Chawhma lam hun chu Pu S.Rochama, Vice President, MSSTA in a kaihruai a. He hunah hian an pawl hmalakna leh dinhmun Pu C.Lalchhanhima, GS hnen atangin ngaihthlak a ni a, an member fam ta te sunna hun pawh hman a ni bawk.
Chawhnu lam program chu MSSTA President Pu Rosangzuala Ralte-in a kaihruai thunga. He hunah hian MSSTA anga hmalakna tur te sawihoin hruaitu an thlang bawk. MSSTA ah hian member 2094 an awm mek a ni.
