14 Jan 2025: Lunglei Police te chuan nikum 2024 chhung khan pawi khawihna hrang hrangah thubuai 240 ziaklutin, thubuai kaihhnawihah hian mihring 290 an man a ni.
Hei bakah hian Lunglei Traffic Police te chuan kum 2024 chhung vek khan lirthei khalhtu dàn bawhchhia te hnen atanga sum an chawitir zat chu Rs 19,51,700 a ni a; dàn bawhchhia sum an chawitir te hi HMV 169 atangin Rs 1,13,500, MMV 6 atangin Rs 7,500, LMV 286 atangin Rs 2,83,700, Three-Wheeler 93 atangin Rs 59,100 leh Two-Wheeler 1,003 atangin Rs 14,87,900 chawitir an ni a; dàn bawhchhia te hi a tam ber chu document fello leh licence neilo-a lirthei khalh te an nih bakah lirthei dah phallohna hmuna dah te an ni.
Lunglei Police te hian kum 2024 chhung vek hian Heroin gram 1,940·03, tualchhung hralhna rate-a Rs 57,94,750 man hu; Rakzu litre 3,019·96, tualchhung hralhna rate-a Rs 20,63,770 man hu; Sapzu litre 2,651·04, tualchhung hralhna rate-a Rs 40,21,240 man hu; Beer can 24, tualchhung hralhna rate-a Rs 12,000 man hu leh Ganja kg 13·016, tualchhung hralhna rate-a Rs 65,000 man hu te manin; heng ruihtheihthil chi hrang hrang an man hlut zâwng hi Rs 1,19,56,769 niin, a kaihhnawihah mihring 122 man an ni a; thubuai 74 an ziaklut a ni.
