15 Jan 2025: Vawiin khan School Education Complex Conference hall-ah Mizoram Samagra Shiksha-in Interactive flat panel GEM kaltlanga an lei chu School Education Minister Dr Vanlalthlana hovin school 13 hnenah sem a ni.
Minister chuan Interactive flat panel chu sorkar hmasa hun laia sem tawh chhunzawmna a ni a ti a. Zirnaah hian khawvel technology changkang zel milin kan kal ve thei tur a ni a, zirlaite hian hna an zawn hunah tunlai technology nen an inel tawh dawn a, chuvangin zirlaibu bakah zirtirtute pawh tunlai khawvel mila kan inher rem ve zel a ngai a ti a. Tunlai khawvelah hian eng nge thleng tih ngaihven a kan inchhiar var a, kan hriatna chu zirlaite kan pek chhawn ve leh a ngai a ni a ti.
Minister chuan classroom a zirtirna chu smart board hmangin audio visual mode-a kalpui theih a lo ni ta tih sawiin zirtirtute chu naupang an zirtirnaah a tam thei ang ber hmang tangkai turin a chah a. Zirtirtute chu naupangte zirtirna kawngah khalh luh tumna goals nei turte leh chumi mila kal thin tur chuan a fuih bawk.
Minister hi Education Consultant Rev Dr K.Thanzauva’n a tawiawm a, he interactive flat panel semnaah hian Samagra Shiksha officer-te leh interactive flat panel dawngtu Principal, Headmaster leh zirtirtute an kalkhawm a ni.
