27 Jan 2025: Larsap Gen. Vijay Kumar Singh leh Central YMA hruaitute chu vawiin khan an inkawm a, Mizoram kawngpui tha hlei thei lo chungchangah Larsap chuan kawngpui chhia a hmunah tlawha hmalak a tum thu a sawi.
Larsap-in a sawm angin vawiin khan Central YMA President Pu Lalhmachhuana leh hruaitu dangte chuan Raj Bhavan-ah Mizoram Larsap hi an kawm a, Larsap chuan Mizo khawtlang nunah YMA pawimawhna leh a hnathawh te a lo hriat tawh thu leh Mizoram leh Mizo khawtlang nun siamthat kawnga theihtawp chhuah zel turin Central YMA hruaitute chu a sawm a.
Central YMA hruaitute hian NGO Darpan Portal chungchanga harsatna an neih te siamrem a nih theihna tura hma lak sak turin an ngen a. India Constitution 8th Scheduled a Mizo tawng dah ve a nih theihna tura hmalak pui tur leh hemi chungchanga Prime Minister hnena lehkha an siam chu thehluh sak turin an ngen nghal bawk.
An inkawmnaah hian Mizoram leh state dang inkalpawhna kawngpui tha hlei thei lo chungchang te sawiho a ni bawk a, Larsap hian Mizorama a awm chhunga inkalpawhna kawngpuiin hma a sawn theih nana tan lak a tum thu leh a hmunah tlawh a tum thu a sawi a ni. (DD)
