04 Feb 2025: Rs 2,60,000 sênga sak PHE Department Lunglei Tui pump-na Pialthleng luhkâ-a Security Watch House chu vawiin tlai khan Er Lalropuia Hmar, Sr Executive Engineer, PHED, Lunglei Water Supply Maintenance Division chuan a hawng.
He hun hmanpuitu Er K.Zohmingliana, Superintendent Engineer Lunglei Watsan Circle chuan thawktute inpekna leh thahnemngaihna avanga Security Watch House tha tak mai hawn theih a ni chu lawmawm a tih thu sawiin; Lunglei khawpui chawmtu Tui pump-na hmun mitinte’n an paltlang thin lakah venhimna tha zawk PHE Dept chuan a neih phah ngei dawn a ni a ti a; Security Watch House sak puitlin a nih mai bakah tui pump kawngah leh pump khawl tihchangtlun kawnga LWSM E.E leh a staff-te inpekna fakawm a tih thu PHE S.E hian a sawi bawk.
Van ruahtui khawl nasa taka kan inzirtir bakah tui hnianghnar zawk kan neih theih nan PHE Dept Lunglei-a thawktute chuan theihtawp an chhuah tih SE Pu Zohminga chuan sawiin, Amrut 2·0 atanga Mizoram Polytecnic Lunglei (MPL)-ah leh HATIM-ah te ruahtui khawlna Tuizêm litre nuai 10 dawng ve ve siam a ni a ti. PHED te hmalakna azarah Lunglei khawpui mipuite tui lama harsatna pawh a ziawm ve zel nia a hriat thu leh Amrut 2·0 hnuaiah Lunglei khawpui chawmtu ber– Tlawng leh Pialthleng te-a tui pump tur khuahtlin chu lian zawka siam hna thawh mek niin; litre maktaduai 240 khuahtlin theih beisei a nih thu leh Lunglei Greater Water Supply Scheme Phase-II atan Mat Lui khuahna tur Concept Paper Rs vaibelchhe 300 senna tur Er Lalropuia, Sr.E.E, LWSM buatsaih pawh sawrkar laipui lamah thehluh tawh a nih thu leh a hlawhtlinna pawh la hmuh ngei an beisei tih a sawi a ni.
Nimin tlaia hawn tak Pialthleng tui pump-na luhkâ-a Security Watch House hi a dung leh a vàng ft 10 ve ve niin, a chhungah inthiarna dah niin, tuizêm dah a ni bawk a; he Security Watch House-ah hian PHE Dept-a thawktute duty dah thin an ni dawn a, helai kawngpui-a veivak mi chi hrang hrangte lakah tui pump-na leh a chhehvel PHE Dept ram te a him zawk nan hna an thawk dawn a ni.
