14 Feb 2025: Vawiin khan Lungleia Chapchar Kut 2025 hman dan tur relin Lunglei District Bawrhsap Pi Navneet Mann hovin Lunglei DC Conference Hall-ah ṭhut khawm buatsaih a ni.
He ṭhut khawmah hian Sub-Hqrs YMA, MHIP, MCO leh MCAA te; MUP leh MZI te leh MDM aiawhte an tel a. Chapchar Kut 2025 hmanna tura thil ṭul hrang hrangte sawiho a ni a. Chapchar Kut hmanna tur thil ṭul hrang hrang lo bawhzui turin Additional Deputy Commissioner chairman-na leh Sub-Headquarters YMA President co-chairman-na hnuaiah Organising Committee din a ni a. Organising Committee ṭhut khawm hun atan February ni 17, 2025 ruat nghal a ni bawk.
Kumin Chapchar Kut hi “Zo nun ze mawi – Hawihhawmna” tih thupui hmangin March ni 7, 2025 (Zirtawpni) hian C.Ṭhuamluaia Mualah hman tura ruahman a ni a. Lunglei Bawrhsap Pi Navneet Mann chu Kut Thlengtu tur niin, Kut Nu atan Health & Family Welfare Minister Pi Lalrinpuii beisei a ni a, hun hman dan tur chipchiar leh ruahmanna dang chu Organising Committee kutah dah a ni.
Hlung taka Kut hman a nih theih nan pawl leh kohhran hrangte chu hemi ni hian programme dang siam lo tura ngen ni se, tih a ni.
