Chapchar Kut 2025 Lungleia lawmna turah MZI leh MDM member zaithiamte zai dawn lo
22 Feb 2025: Mizo Zaimi Inzawmkhawm ( MZI ) Hqrs Lunglei leh Music Domain Mizoram (MDM) Dist Hqrs Lunglei hruaitute chuan vawiin chawhnu dar 1:00 khan thuthar thehdarhtute kawmin Chapchar Kut 2025 Lungleia lawmna turah an member zaithiamte an zai dawn lo tih an sawi.
Lunglei Press Club a thuthar thehdarhtute an kawmna MZI Hqrs Lunglei President Pu P.Lalhmangaihzuala kaihruaiah hian MZI leh MDM Lunglei hruaitute chuan Chapchar Kut 2025 Lungleia lawmna turah Organising Committee atanga MZI leh MDM te engmah hriattirna awm lova paih thla a, an member atanga zai tur ruat chungchangah pawh pawl pahnih te hriatpuina tel miah lova ruat fel an nih hnu leh engkim tihfel vek tawh hnua Organising Committee a lakluh leh hnuhnawh an ni chu an hriatthiam loh thu tarlangin pawl leh Lunglei zaimite palzutna lian takah an ngai tih an sawi. Hetiang anih avang hian kum 2025 Chapchar Kut Lungleia lawmnaah pawl pahnih MZI leh MDM Lungleia member te chu zai ve loh mai nise an tih thu an sawi bawk. Hei bakah hian pawl pahnih member zinga Chapchar Kut a zai tura sawm leh zai lui te chu pawl pahnih te hian an member an member nihna an hlih sak dawn bakah he pawl pahnihah hian engtikah mah member an nih theih dawn loh thu an sawi.
Vawiina thuthar thehdarhtute an kawmnaah hian MZI Hqrs Lunglei President Pu P.Lalhmangaihzuala leh MDM Dist Hqrs Lunglei President Pu Joseph VL.Muanpuia te bakah MZI leh MDM hruaitu engemawzat telin Chapchar Kut tihbuai hrim hrim an tumna lam a nih loh thu leh Lunglei zaimi te thlavang hauh vanga hetiang thutlukna hi siam an nih thu an sawi.
