The Mizoram Liquor (Prohibition) Amendment Bill, 2025 chu kuthnathawktute lamtang Bill niin sawi
10 March 2025: Excise & Narcotics Minister Pu Lalnghinglova Hmar chuan zu khapna dan siam thatna, The Mizoram Liquor (Prohibition) Amendment Bill, 2025 chu zu phalraina tur Bill a ni lo va, kuthnathawktute lamtang Bill a ni, a ti.
Mizoram Legislative Assembly Budget Session vawiina neih chhunzawmah, zu khapna dan siam thatna tur, The Mizoram Liquor (Prohibition) Amendment Bill, 2025 chu sawiho a ni a, Bill puluttu, Excise & Narcotics Minister Pu Lalnghinglova Hmar chuan Bill thar chuan sawi lawk a hlawh nasa hle a ti a, Bill thar atanga sum lut tur awm mahse, chhiah tam tak lak theihna tur a awm lo va, hei vang hian sorkar chuan sum siamna tur leh vote zawn nana tih a ni lo a ti a, kuthnathawktute lamtang Bill a ni, a ti.
Minister chuan Bill thar chu Excise department-a thawktute tan hah phahna tur ni mahse kuthnathawktute tan hlawkna tur a ni dawn a ti a, zu khapna dan hman mekah chuan, Champhai leh Hnahthial Winery atanga siam, Grape Wine chauh siam phalsak a nih avangin thei dang chingtute a huam lo a, Bill thar chuan, thei dang atanga Wine siam pawh a phalsak dawn avangin kuthnathawktu thei chingtute duhsakna a ni dawn a ti a, hetihlai hian Kohhran lamin Bill putru an lo hmuh atanga tih loh an duh thu a hnena an thlen chu ZPM Legislature Party chuan March ni 1 khan ngaihtuahin, zupui leh zu tuitling chu an paih leh ta a ti a, hei bakah hian zufang siam phalna pawh an paih tel tih a sawi a, Bill tharin a phalsak tur chin chu sorkar hmasa in a lo duan tawh ang tho, Grape Wine siam phalna, alchohol zaa 10 aia sang lo chu Grape bakah thei dang chi hrang hrang hmanga Wine siam phal a ni tawh dawn a ni, a ti.
Hei bakah hian Minister chuan tualchhung siam Beer siam phalna duan tel a ni a ti a, hetihlai hian Bill thar chuan state pawn atanga Wine leh Beer lakluh a khap dawn bakah a sen chi leh rakzu te a khuahkhirh dawn a ti a, hemi bikah hian Autonomous District Council te pawh a huam dawn tih a sawi bawk. (DD)
