04 April 2025: Mizo Zirlai Pawl Headquarters:Lunglei chuan thuchhuah siamin, Lunglei leh Chhim lam mipuite’n hun rei tak nghakhlel taka kan lo thlir tawh ATL Road siam ṭhatna tur sum Rs vaibelchhe 90.69 pawh pen a ni chu pawi a tiin a hrethiam lo hle a, tun dinhmunah Pukpui leh Mausen inkar kilometre 14 chauh siam ṭhat tum a ni chu he kawngpui hmang ṭangkaitu chhim mipuite zahlohnaah MZP Hqrs.: Lunglei chuan a ngai, an ti
Ni 14 March, 2025 Assembly Budget Session-a PWD Minister Pu Vanlalhlana thusawi Bagheeratha Engineering Company Performance Bank Guarantee aṭanga sum hmuh let cheng vaibelchhe 90.69 hi Mizoram Legislative Assembly Estimate Committee chuan sorkar hnenah ATL road siamna atana hman ni rawh se tiin a thlen a. Sum hmuh cheng vaibelchhe 90.69 aṭanga cheng vaibelchhe 45.89 chauh ATL road siam-na tur atana sum dah a ni hi sorkar thuneitute’n ennawn leh turin MZP Hqrs.: Lunglei chuan a ngen, tih an tarlang bawk.
MZP Hqrs.: Lunglei chuan ATL road siam ṭhatna tur sum pawh pen hi kan hmuh let leh ngei theihna atan theihtawpin hma a lak chhunzawm zel dawn a, Lunglei tan leh mipui tan kawng ṭha kan neih theih nan a tawp thlengin hma kan la dawn a, mipuite thlawpna kan dil nghal bawk a ni, an ti.
