17 April 2025: Vawiin chawhma lam khan Lunglei SP kaihhruaina hnuaiah Ṭhaizawl Refugee Camp-ah Awareness Campaign for Myanmar Refugee buatsaih a ni a. He hunah hian Lunglei SP Pu J.Lalmuankima leh staff te bakah Sub-Hqrs YMA, MZP Hqrs Lunglei leh MSU Regional Hqrs Lunglei te’n hun an hmang a ni.
Pu J.Lalmuankima chuan, raltlante chu Mizoram hmun hrang hrang a kan buaipui mek leh ṭhalai tam tak suattu ruihhlo tawlhrutu ni lo tur leh a ti lui kan awm anih chuan dan anga hrem an nih tur thu a sawi a. Lirthei license nei lo va khalh lo tur leh an khalh lui anih chuan dan anga hmalak anih tur thu sawiin, Kenbo 125 te chu mahni awmna camp theuhah khawtlang hruaitute leh Police te nen tangkawpin; hmun khatah khalhchhuah theihlohva dahkhawm turin hmalak a ni ang a ti.
Lunglei SP Pu J.Lalmuankima chuan raltlan camp-ah hian duty te dah an nih tur thu leh heng duty te leh raltlan camp leader te remtihna lo chuan camp aṭanga duh ang anga luh leh chhuah hi khuahkhirh anih tur thu a sawi bawk.
Sub-Hqrs YMA Lunglei Treasurer Pu K.Lalhruaitluanga pawhin, YMA kalphung leh hmalakna te a tarlang a, an chenpuite tana hnawksak lova awm turin a chah a, YMA Dan Bu leh Chhiatni Ṭhatni Inkaihhruaina Bu a hlan nghal a ni.
Pu Johan Hmangaihzuala Ralte, MZP Hqrs Lunglei President pawhin thusawiin, Camp chhunga zirlai awm zatte leh an harsatna te MZP hnena thlen turin a ngen a, MZP chuan a theihna chinah a buaipui zel tur thu a sawi a. Tunhnaia raltlante pawikhawih an awm ṭhin chu pawi a tih thu sawiin; Lunglei District chhunga raltlante chu hetiang kawnga inhnamhnawih ve lo turin a ngen a ni.
MSU Regional Hqrs Lunglei Secretary Pu C.Lalthlamuansanga pawhin, raltlan naupangte chu zirna ngai pawimawh tur leh nu leh pa pawhin an theihna kawngah an fate zirna lama an hmasawn theihna tura hma la turin a ngen a ni. Ṭhaizawl Refugee Camp-ah hian tun dinhmunah chhungkua 167 awmin, mi 746 an cheng mek a. Zirna in hi Primary aṭanga Higher Secondary thleng a awm a ni.
