28 May 2025: Nimin khan New Delhi-a cham mek Chief Minister Pu Lalduhoma leh Pu Ashwini Vaishnaw, Railways Minister chu an inkawm a, Bairabi-Sairang rel kawng hmasawnna tur thil pawimawh te an sawidun.
Chief Minister chuan Rajdhani Express Service hi Sairang atanga New Delhi thleng tlantir tur leh Howrah Railway Service pawh Sairang atanga Kolkata thlenga tlantir a nih theih nana hma la turin Railway Minister hi a ngen a. Sairang atanga Tripura direct rail service a awm theih nana hma laksak turin a ngen bawk.
Heng bakah hian Sairang Railway station chu India ram hmun danga an kalpui mek ang bawkin world class railway station-a siam turin a ngen a, Railway Reservation Centre leh Parcel Management System din te, Sairang Railway Station-a Railway Internet Service dah ve tur tein a ngen bawk. Union Minister chuan tihhlawhtlin mai theih thil a nih thu leh hma a lo lak ngei tur thu a sawi a ni.
Mizorama Railway Station hrang hrang Hortoki, Kawnpui, Mualkhang leh Sairang a thawktu tur laknaah khawtual mi te duhsak bik turin rawtna a thlen bawk a, Railway Minister hian a lo zirchian tur thu a tarlang. (DIPR)
