04 June 2025: Tunhnaia PHE Department-in Lunglei khawpui chhung veng thenkhata tui an sema thil tle nuar nuar hmuh chu PHE lam thawktuten an hriat veleh thil awmzia an enfiah nghal a. Ngun taka an chhui chian hnuah tui tih thianghlimna an lo pawlh tam palh vang niin PHED Lunglei hotute chuan an sawi.
PHED lam chuan hetiang tuisem dawngtu Consumer zawng zawngte chu paih tirin; tui dang pe leh turin hma an la nghal a, tui an dahkhawlhna Tanky liana tui awm pawh an paih nghal vek bawk.
PHE Deptt hotute chuan hetianga tui tih thianghlimna an pawlh tam palh avang hian mihring tan a hlauhawm lo va, a hmel hmang a lan mawi takloh avangin Consumer-te tui dawn sa chu paih tir mai an ni tih an sawi a, an tui dahna tuizem pawh silfai kher a ngai lo, an ti bawk.
Hetihlai hian Social Media lamah mi thenkhatin mihring tana hlauhawm thei anga sawi an awm chu thu diklo anih avangin mipuite chiai lo turin PHED hotute chuan an ngen a ni.
