12 June 2025: Lawngtlai District chhunga Government High School, Parva zirtirtu Pu V.Lalhmangaihzuala chu Govt Modern High School Lungtian-ah sawn anih avangin Parva Join Action Committee chuan lungawilohna lantirin an khuaa zirna in zawng zawng an khar.
Govt Modern High School Lungtian-a Mathematics zirtirtu Pu H.Lalhmingmawia, Govt Aizawl High School a sawn anih chungchangah Joint Co Ordination Committee Lungtian ten lungawilohna lantira Sorkar an nawr hnuah Lawngtlai District chhunga Government High School, Parva zirtirtu Pu V.Lalhmangaihzuala chu Govt Modern High School Lungtian-ah sawn a ni a, hei hi hriatthiam har an tih thu Parva khawtlang hruaitute chuan thuchhuah siamin an tarlang a, Transfer order chu a rang thei ang bera sut turin an phut bakah Parva Join Action Committee hian vawiin khan zirtirtu transfer-in an khua a chhuah san tur chu an dang a, hemi rual hian khuaa zirna in zawng zawng tiam chin awm lovin an khar nghal a ni.
Parva Join Action Committee chuan, Govt. Parva High School chu an khua leh a chhehvelin zirna in sang an neih chhun a nih avangin an hlut hle tih an sawi a. Hetih rual hian an khaw High School chuan ngaihsak a hlawh tawk lova, kum tin zirtirtu nei kim lovin Academic Session an hmang tluan ziah a, zirlaite pawhin harsatna an tawh phah thin tih an sawi a. Zirtirtu indaih lohna phuhruk sak tura tum engemawzat thuneitute an ngen hnuah Middle School atangin Chakma pahnih Attached a dah an ni a, Headmaster pawh Chawngte a awm anih avangin School a kal ngai lova, a chungchang hi DEO hnenah thlen ni mah se, awmzia a awm lo tih sawiin, tuna an khaw High School-a regular teacher awm chhun Pu V.Lalhmangaihzuala chu Lungtiana sawn a nih chuan Middle School atanga Attached a dah Chakma pahnih chauh zirtirtu an neih dawn avangin Sorkar chu a rang thei ang ber Transfer Order sut turin an phut a ni. (AIR)
