13 June 2025: Vawiina Mizoram State Aids Control Society (MSACS) leh Association for Voluntary Blood Donation (AVBD) buatsaiha khawvel huapa a thlawna thisen pe thin te Ni, World Blood Donor Day puala Dawrpui Multipurpose Centre, Aizawla hun buatsaih a hmanpuinaah Land Revenue & Settlement Minister Pu B.Lalchhanzova’n chuan, thatlai hun berah ruihhlo hnawl ngam a, dam rei tura taksa vawn that a pawimawh thu a sawi a, a thlawna thisen pe thin te chu an thiltih lar lova a lan pawhin Pathianin a hriatpui a ni tiin, a thlawna thisen pek chu a dawngtute tan pawh thil lawmawm tak a ni, a ti. Midangte tana inpekna a tam chuan malsawmna a lo thleng thin tih a sawi.
Kumina World Blood Donor Day hian thupuiah ‘thisen pe la, beiseina siam rawh, tangrualin nunna kan chhan thei’ tih, “Give Blood, give hope: together we save lives” tih hman a ni a. MSACS tarlan danin nikum tangka kum chhung khan thisen unit 34,752 pek niin heta zaa 93.71, unit 32,566 chu a thlawna pek anih thu an tarlang a. Kumin tangka kum kal mekah April atanga May thla chhung khan thisen Unit 5,713 pek tawh niin heta zaa 90.11, unit 5,148 chu a thlawna pek a ni a, Blood Donation Camp 90 buatsaih a ni tawh bawk a ni.
Vawiin World Blood Donor Day puala hun hmanah hian thisen pe tha te lawmman hlan a ni a, zirlaite kalkhawmin thisen pe turin thu an tiam bawk a ni. (AIR)
