CYMA President-in YMA chu tlawmngai pawl pakhat mai ni lo hnam innghahna lungphum a ni, a ti
14 June 2025: Kumin 2025 YMA Day puala thuchah a sawiah CYMA President Pu Lalhmachhuana chuan, YMA chu Mizoram chhung chauh ni lo, India ram zau zawk pawh hriat a hlawh hle a ti a, Ram tana thil tha tih chhunzawm zel tur leh YMA-te’n lawmman beisei vang ni lovin, ram leh hnam tan hma la zel turin a chah bawk.
Pu Lalhmachhuana chuan YMA chu tlawmngai pawl pakhat mai ni lo hnam innghahna lungphum, Mizote phuarkhawmtu, a tul ang zela Ram leh Hnam tana ke pen thin a ni a ti a. Thlei bik a nei lova, a te ber atanga a lian ber thleng hian angkhatin YMA chuan a hrut rual vek a ti a, Mizoten YMA an nei chu an vanneih pui tih sawiin hnamdangin an awt hle a ti. Tunlai thangthar zingah YMA hlutna hrefiah zo lo awm palh thei a ni tih sawiin a tul ang zel a inhrilhfiah a pawimawh tih a sawi bawk.
Central YMA President chuan YMA chu a bul tantute atanga tun thlengin hma a la sawn zel a ti a, YMA member Nuai 5 an tling tawh tih sawiin Group YMA 50, Sub Headquarters 8 leh Branch 821 a awm ta chu a bul tantute, YMA hruaitute leh member, veng tin leh khaw tina tanlatute avang a ni, a ti.
YMA dinna leh innghahna, ‘Tanpui ngaite tanpui’ kawngah ke an pen zel tih sawiin Central YMA chuan Home/Centre leh Damdawiin hrang hrang bakah Zoram pawna Mizo Welfare hrang hrangte-ah an luangchhuak tih sawiin, Sub-Hqrs YMA leh Group YMA te pawhin an mahni huamchhungah theuh chanhai leh tanpui ngaite tan an luang chhuak leh thei te chu YMA hlutna tizualtu a nih thu a sawi bawk. (AIR)
