16th June 2025: Vawiin khan Planning & Programme Implementation Conference Hall-ah Chief Minister Pu Lalduhoma chuan, tun thla chhunga kalpui tur Dharti Aaba Janjativa Gram Utkarsh Abhiyan (DAJGUA) Awareness & Benefit Saturation Camp a hawng.
Chief Minister chuan, Mizoram mipui 94% aia tam hi tribal kan ni a, State dangah chuan tribal te hi hnam tlem zawk an ni hlawm a, keini ramah chuan hnam tam zawk kan ni. Chuvangin central sawrkarin tribal te hamthatna a rawn duan hi kan state pumpui hamthatna a ni nghal a, State sawrkarin hmasawnna scheme a duan pawh tribal hamthatna tur a ni nghal zel, a ti a. Kan dinhmun an rawn hriat avangin sawrkar laipui pawhin he awareness leh benefit saturation camp hi tha taka kalpui a, state dangte entawntlak khawpa tihlawhtling turin min beisei a. Min beisei ang ngeiin a mawhphurtu zawng zawngten tha taka hlen theuh kan tum dawn nia, tiin a mawhphurtute a chah a ni.
Chief Minister-in thu a sawi zawh hian kal khawmten zawhna an neih te an zawt a, sawihona te an nei zui a ni.
DAJGUA hi sawrkar laipui flagship programme niin kum 2047 a India ram developed country-a hlankai tumna kalkawnga tribal mipuite zirtirna leh an mamawh zualpui pekna tura hmalakna a ni. Sawrkar laipui chuan a kalpuitu tur line department 17 a thlang a, heng line department-te hian thawkhovin (convergence) India ram tribal awmna district thlanchhuah 549 ah te hna hi an thawk ang.
Mizoram bikah chuan line department 14-te’n district 11-a mihring nuai li vel huamin khaw 383-ah kalpui a ni. Camp hawnna inkhawm hi Pu Lalbiakzama, Speaker, Pu Vanlalhlana, PWD Minister, Pu Lalthansanga, Minister, EF & CC, Dr. Vanlalthlana, I&PR Minister, Prof. Lalnilawma, Horticulture Minister leh Pu Lalnghinglova Hmar, Tourism Minister ten an telpui.
