Agriculture Minister-in thlai chi li rate mumal tak sawrkarin a bithliah tawh a ti
12 July 2024: Vawiin khan Agriculture and Farmers Welfare Department Minister Pu PC Vanlalruata chuan Vaphaiah Block Agriculture Office leh Animal Feed Processing Plant te a hawng a. Vaphai Primary Agriculture Credit Society pisa a tlawh bawk.
Block Agriculture Office (BAO) leh Animal Feed Processing Plant hawnna inkhawm Vaphai Community Hall-a neihah Pu PC Vanlalruata chuan BAO Office hawn a nih theih nan a sulsutu sawrkar hmasa leh official-te chungah lawmthu a sawi a. Vaphai leh a chhehvel khuaa kuthnathawktu ten tangkaia tak an hman theih nan duhsakna a hlan a ni.
Agriculture Minister chuan Kuthnathawktuten awlsam zawka thlai thar an hralh theih nan thlai chi li – sawhthing, aieng, hmunphiah leh hmarcha te rate mumal tak sawrkarin a bithliah tawh a, thlai dang pawh tih chhoh zel tum niin Chief Minister kaihhruaina hnuaiah buh hum lei dan tur ngaihtuah mek a ni, a ti bawk. Pu PC Vanlalruata chuan thlai rate mumal tak bakah kuthnathawktute tan Crop Insurance pawh tih chhoh tum a ni tih a tarlang a. Sawrkarin kuthnathawktute hma khua a tan sum leh pai hman a tum a, mipuite chu sawrkar atanga hamthatna dawngtu ‘beneficiary’ mai ni lova sawrkar thawhpuitu ‘partner’ ah an ngai tih sawiin hmasawnna rahbi nghet leh tluantling zawh puiah a sawm a ni.
Khawbung Block Agriculture Office, Vaphai hi Border Area Development Project 2013-2014 sum Rs nuai 10 hmanga sak a ni a. Kum 1979 atanga ding tawh Agriculture Department Circle Office chu March ni 9, 2021 khan Block Agriculture Office ah hlan kai niin, Khawbung RD Block hnuaia khua te a huam a ni.
Animal Feed Processing Plant hi Vaphai Primary Agriculture Credit Society te din a ni a. Warehouse, pisa, kudam, Transformer leh a panna kawng laih nan Rs nuai 47 sen a ni a. Thlai herna khawl leh hriak herna khawl hi sawrkar laipui scheme Pradhan Mantri Janjatiya Vikas Mission hnuaia Van Dhan Vikas Kendra kaltlangin Cooperation Department ten an bun sak a ni.
