An naupangte tana inchhi ral turin DEO-in zirtirtute a fuih

30 Oct 2025: Vawiin chawhma dar 11:00 khan Education Complex Conference Hall-ah Lunglei District Children Science Congress neih a ni.

Children Science Congress tanna inkhawm Pu H.Lalramnghaka, Co-ordinator CSC kaihhruaiah hian hun hmanpuitu Pu Mickey R.Lalenkawla, DPC Samagra Shiksha leh DEO Lunglei ni bawk chuan thu sawiin, Lunglei District chu District lian tak niin zirna in pawh a tam a, heti zat zirlai an tel thei chu lawmawm a tih rualin tan lak erawh a la ngai hle a ni a ti a, a bikin High School leh Middle School Science zirtirtu tha awmna te chuan hetiang hun hi ngaihhlut nachang kan hriat a tul a ni a ti. Zirtirtute hi Bati ang kan ni a kan naupangten hamthatna an hmuh a vanneihna an dawn ve theih nan kan inchhi ral tur a ni Pu Micky-a chuan a ti.

Science Congress a tel naupangte chu an tih that peih chuan Science Seminar a tel theihna remchang India ram hmun hrang hrangah a awm a, an hmuh ngailoh tur ram tam tak an hmu thei tih hria se a duh thu sawiin, a aia sang zawk leh thui zawk thleng thei tura chhunzawm zel turin DEO chuan a chah a ni.

District Level Science Congress vawiina Education Complex Conference Hall-a neihah hian Junior Child Scientist (Middle School) atangin School pahnih leh Senior Child Scientist-ah High School pariat atangin zirlai naupang 20-te’n Science thiamna tangkai dan kawng hrang hrangin a lem nen entira sawifiahin an inel a ni.