Baal hmaa thing thi ngai lo MNF-in a nei ru teuh niin tarlang

31 Oct 2025: Vawiin chawhma dar 11:00 khan Mizo Hnam Run Lunglei-ah chhung inkhawm leh sharing hun hman a ni. Pu Rosanga Hmar, Treasurer Mizo National Senior Front Sub Headquarters Lunglei  chuan kaihhruaiin Pu Ramtharzuala General Secretary Mizo National Youth Front Sub Hqrs Lunglei chuan hunserh a hmang a, Sharing hunah mi engemawzatin thu an sawi bawk.

Sharing hun zawhah President Pu Vanlalhmuaka  chuan  thusawiin, MNF party hi inthlanpui lo awm leh hmasa ber turah Mizoram leh ram mipuite tana sawrkarna siam turin a inbuatsaih mek a, khawtin, vengtinah Baal hmaa thing thi ngai lo, Mizoram leh ram hnam tan a tul hun che chhuak thei, Mizoram tana tha thawh a tul huna pen chhuak thei mi sang tam tak MNF-in kan nei ru teuh hi a ropuiin a lawmawm tak zet a ni, a ti. Total Bandh kan neih ni khan MNF-te kan inpumkhat zia a lang a, hnam run rawn thleng ngai lem lo, MNF thuthlung leh hmathlir a chiang mi sang tam tak MNF-in kan lo neih zia a lang chhuak kha, a ropuiin kan hmabak hi a eng mek a, a eng zual zel dawn a, karleh thawhlehni, November 4, 2025 khian chhimlamah kan president Pu Zoramthanga hova hman tur boruak hlimawm takin min hmuak leh mek te hi a lawmawm tak zet a ni, a ti.

Pu Hmuaka chuan, total bandh hlawhtling tak neih theihna chhan, ram mipuite thlawpna, NGO hrang hrang leh Kohhran hruaitute, Association hrang hrang thlawptute, sum leh pai thawhtute zawng zawng leh FCAA 2023 adopt tak sut a nih theih nana che chhuak zawng zawngte chungah lawmthu a sawi nawn leh a. FCAA 2023 adopt tak chu sut anih ngei theih nan MNF chuan bul a tan tawh a, a tawp san mai mai dawn loh thu a sawi bawk.