07 March 2025: Vawiin-ah Chapchar Kut chu C.Ṭhuamluaia Mualah hman a ni a, Health & Family Welfare Minister Pi Lalrinpuii chu Kut Nu niin, Lunglei District Bawrhsap Pi Navneet Mann chu Kut Thlengtu a ni.
Kut Nu Pi Lalrinpuii chuan Lunglei District mipuite Chapchar Kut chibai bukin, Chapchar Kut chu ‘Remna Kut” a nih angin inremna ni atan hmang turin kut hmangtu zawng zawngte chu a chah a. Mizoram run mektu ruihhlo leh HIV/AIDS chu Mizo nihna nen a inhmeh lo tiin, ṭhalaite chu ruihhlo laka inthiar fihlim a, HIV/AIDS darh theihna lakah leh mipat hmeichhiatna lakah invawng thianghlim tlat turin a chah a ni.
Pi Lalrinpuii chuan kum 2019-a Prime Minister Pu Narendra Modi-a’n Lunglei Pukpuia Mizoram Engineering College a lo hawn tawh tun thlenga la function lo chu a function theih nan Mizoram sawrkarin hma a la mek tih sawiin, a panna kawng siamna, staff quarters sakna leh tui leh eng pekna atan Rs vbch 25 leh nuai 41 lai ruahman fel a nih thu a sawi a. Staff lak a nih theih nan post 63 siam niin, hnawh khah theih thuai beisei a nih thu a sawi.
Kut Thlengtu Pi Navneet Mann chuan Mizo ṭawnga inlawmna thu sawiin, Chapchar Kut hmang tura kal khawm zawng zawngte kut chibai a buk rualin duhsakna a hlan a ni.
Lungleia Chapchar Kut lawmna hun hi Organising Committee Co-Chairman, Lunglei Sub-Headquarters Young Mizo Association (YMA) President Pu K. Lalfakzuala’n a kaihruai a. United Pentecostal Church (North East India) Lunglei District Superintendent Rev. C. Lalrintluanga’n hunserh a hmang a ni.
Chapchar Kut lawmna hun hnihnaah YMA branch 20-in sarlamkai entirin, YMA branch 9-in khuallam an entir a. Nursing School Lunglei leh Sub-Hqrs YMA Cultural Troupe te’n special item (lam chi hrang hrang) entirin, MCAA Sub-Hqrs Lunglei te’n chheih lam, Mizo Hmeichhe Insuihkhawm Pawl (MHIP) Sub-Hqrs Lunglei te’n tlanglam leh Mizo Cultural Organisation (MCO) General Hqrs Lunglei leh MCO branch 10 te’n chai an entir bawk a. Chapchar Kut concert buatsaih chhunzawm niin, zaithiam hrang hrangte’n zaiin kalkhawmte an awi a ni.
An kuta dah anih anga District MJA Lunglei hmalaknain Chapchar Kut Miss 2025-ah Lalramchuani (Ramthar) chu thlan a ni a. Lunglei Photographers’ Association (LPA) te’n hnam thuam inbel naupangte aṭangin Kut Hraite thlang bawkin, Kut Hraite mipaah Amos Vanlaltlanhlua (Khawmawi leh hmeichhiaah Elena Lawmsangkimi (Salem Veng) te thlan an ni.
